Щак бакъа, хIакьину Дагъусттаннай ца яла тIалавмур балайчину хIисав хъанай бур Лариса ХIажиева. Лакрал тамашачитуран бакъассагу, Лариса ххирану бур цинявпагу Дагъусттаннал миллатирттал тамашачитуран.

Акъахьунссар ванил чIунилгу, такьвалулгу, авуршиврулгу ясир къаувсса тамашачи цавагу. Лариса ХIажиева бур Дагъусттаннал культуралул цIа бюхттул дуллалисса, миллатрал пахру бан лайкьсса артистка.

Ва ххираминнансса ххаллилсса бахшишну хьунни цIусса шинал дайдихьулий «Европа» залдануву Лариса ХIажиевал кка­ккан дурсса концерт.

[dropcap]В[/dropcap]а концертрайн бучIан ччай, билетру къабиривссагу ливчIунни. Ларисал концерт ххал дан, шагьрурдая бакъасса, районная бувкIссагу чIявусса бия. Щаллу-ккурккисса учительтурал делегация бувкIун бия Ккурккуллал шярава. «Жун Лариса ХIажиева укунмагу ххира­ссияча, Ккурккуллал Щазахасса балайлул жун ва хъиннува ххира бунни», — тIий бия Ккурккуллал учительтал. Вайннан хавар ба­къулийсса бахшишну хьунни Ларисал цила концертгу ва балайлийну дайдишаву.

Цила цIанил бюхттулшиврух къабурувгун, дакI хъуншиву къадурну, Лариса цуппагу бия гьарца тамашачинах къулагъас дан хIарачат буллай. Цуппагу, гьар мудан кунма, цIу буну, дагьан дурну ларххун, сахIналул ссурухIи кунма бия.
Щалагу концерт нани­ссаксса хIаллай залдануву дия ляличIисса рахIатшиву: цинявппа кувннан кув ххира­сса, кIулсса инсантал дуссухун бавтIсса куннасса тагьар дия. Концерт мукьра-ххюра ссятрай най диркIнугу, тамашачитурал мякь ливххун бакъая, хъат­ру ришлай, яла-ялагу буккан буллай бия. ТIутIавун багьлаган бунни тамашачитурал цанма ххирасса балайчи.
Цинявппагу ва концерт­райн бувкIсса артисталгу бия, цуппа Лариса кунма, гьунар бусса, нукIува тамашачитуран ххира хьусса: МухIсин Камалов, ПатIимат Кьагьирова, Роза Макьсумова, Рукьият ХIамзатова, Зульфия, Карин Кьадинаев, Шагьалай МахIаммадова, Нурианна Къаллаева, Аьбдул Мурадов.

 

Концертрал мажлис усттарну бачин бувну бия ДР-лул культуралул лайкь хьусса зузалт Ссупиян Оьмаров ва Тамара Закаръяева.
Концерт къуртал хьуну махъ тамашачитурахь барчаллагь учин бувккуна Лариса цила ппу Ибрагьинхалиллущал.

— ДакIнихтуну барчаллагь тIий бура ттулва чIарав бавцIусса, ттула кьини хъун дурсса коллегахъахь, режиссертурахь, хаснува зухь, тамашачитурахь. Нава зун ххирассаксса зугу ттун ххирассару. Ттула творчествалун зу бивщусса кьиматри ттун яла бусравмур. Нава зун кьамулсса ва ччисса бушиву ттун цал уттигу исват хьунни, — увкунни ванил.
Тамашачитурал чулуха­сса лавайсса кьиматгу Ларисал лайкь бувссар цила миллатгу, миллатрал культурагу ххирашиврийну. Пагьму-гьунар бу­сса бушивруцIун, чил макьаннайн иман къадирхьуну, лакку макьанну гьаз дуллалисса, ла­кку балай бюхттул буллалисса бур ванил хъунмур мурадгу. Ванил репертуардануву бур машгьурсса лакрал шаэртурал шеърирду.

 

[dropcap]Ш[/dropcap]аэртурал, балайчитурал, композитортурал ватанну хьу­сса Хъусращиял шярава Лариса кунмасса балайчи буккавугу махIаттал хьунсса зат ба­къар. Усттарсса шеърирдалли балайлун оьрму булайсса. КIива гьунар хIала бувххунни дунияллийн ххазинартту ляхъай­сса. Укунсса ххазинану хьуссар дунияллийх цIа ларгсса композитор Ширвани Чаллаевлул ва Лариса ХIажиевал дуэт. «Ина ттул кIилчинмур Ватанна», — увкуну бур Ширвани Чаллаевлул, Ларисал творчествалун кьимат бишлай. Лариса ХIажиевал творчествалун лавайсса кьимат бивщуну бур Аьрасатнал хьхьичIунсса критиктурал ва музыковедтуралгу.
Балай чаврил гьунаргу Ларисаву чIаванияцIава загьир хьуну бур.

— ДакIний бур, ппу Хъусрахь завферману зузисса чIумал, чIивисса нава кIанттуйн ла­хъан бувну, балай тIутIи бувнува бикIайссияв. ЧIиви душних вичIи дишин най буру тIий, фермалийн бучIайва чIаххуврайсса Ккуллал шяравасса жагьилталгу. Ца-цаннал на ххари бан ттул каниву къурушругу дишайва. Ттунмарив дакIний-мазрайвагу бакъассия музыкалухун унгу-унгуну багьансса. МарцIсса хххювардай школагу къуртал бувну, на бувкIссара шагьрулийн, Мединститутравун бу­ххансса ниятрай. Заннал чичру духьунссия, ттун творчествалул ххуллу кьисмат хьунни, музыкалухун багьансса пикривагу бакъанма, дуклан бувхссияв МахIачкъалаллал Готфрид ХIасановлул цIанийсса Музыкалул училищалувун, — тIий, дакIнийн бутлай бур Лариса.

Училищагу марцIну ххювардай къуртал бувну, Лариса бувххун бур С. Рахманиновлул цIанийсса Ростовуллал консерваториялувун. Мунияр махъ зий бивкIун бур Дагъусттаннал опералул ва балетрал театрдануву, Хъусращиял дянивмур даражалул школалий музыкалул учительну, «Дагъус­ттан» ГТРК-лул хорданул солисткану. 2009 шиная хIакьинусса кьининин зий бур Татам Мурадовлул цIанийсса Дагъусттаннал паччахIлугърал филармониялул солисткану. 2002 шинал хьуну дур Ларисал цалчинсса концерт.
Лариса ХIажиева шамийлва гьуртту хьуссар «Музыка против террора» тIисса проект­рал лагрулий хьусса дунияллул даражалийсса концертирттай, кIийлва – Кремлилул Дворецраву, цал – Санкт-Петербурглив. Дагъусттанная так ца Ларисар гьуртту хьусса вай укун­сса концертир­ттай. ХIасил, Москавуллал сахIналийгу Ларисал лайкьну ккаккан бувссар Да­гъусттаннал магьирлугърал лавайсса даража. Ясир бувссар Аьрасатнал бакъассагу, архсса ва гъансса чил билаятирттал тамашачиталгу.

[dropcap]Я[/dropcap]кутиянаву 2005 шинал чIявусса билаятирттал вакилтал гьуртту хьусса ассамблеялийн гьан бувну бивкIссар Ширвани Чаллаев, ТIагьир Курачев ва Лариса ХIажиева. Тиккугу вайннал хIайран бувссар тамашачитал, бюхттул дурссар Да­гъусттаннал цIа.
ХIакьину Лариса ХIажиева хIисав хъанай «Дагъус­ттаннал халкьуннал артистка» тIисса цIа ларсъсса яла жагьилмур балайчину. Творчествалул ххуллий ва лайкь хьуну бур цикссагу наградарттан. Миннувух бур личIи-личIисса Аьрасатнал ва дунияллул халкьуннал дянивсса фестивальлай ва конкурсирттай лавсъсса дипломру, хIурматрал грамотартту. Ванил ларсун дур музыкалул аралуву ца яла сий думур награда – «Золотой микрофон», мукунна «За верность Дагестану» тIисса медаль.
— Ттун хьхьичIва-хьхьичI бав­ссар Ларисал балай Мазагьиб Шариповлун 50-шин шаврин хас дурсса концертрай.

Тани ванин дурагу 16 шин дия.
[dropcap]М[/dropcap]ахъра-махъсса репетиция дуллалисса чIумал, гьар мудан кунма, залдануву аьлагъужа бия. СахIналийн бувккуна хIурулъэн хьусса чIавасса душ. Ттизаманнул балайчитал баган къабизай­сса на, личIисса къулагъас къадурссия. Ларисал балай байбишайхту, ванил чIу ттул оьтту-ттурчIавун бияннин бюв­ххуна. Мунил балайлул такьвара дия ляличIисса. ЧIалай бия Занналва буллусса гьунар бусса душ бушиву, — укун дакIнийн бутлай бур Дагъусттаннал халкьуннал артистка Фаина Графченко.

Имара Саидова,
Андриана Аьбдуллаева