Дагъусттаннай 2024-ку шин туризм хьхьичIуннай шавриву рекорд ккаккан дурсса шин хьуну дур. Дагстатрал хIасиллайн бувну, аьмну 20, 272 миллиард къуруширттал туризмалул услугарттахлу хьуну дур, 2023-ку шиналнияр 2,647 миллиард ххину.
Укунсса хьхьичIуннайшиврул республикалул экономикагу лябуккулий гьаз дуваврин кабакьу буллалиссар, цIу-цIусса зузи кIанттурду буллалиссар. Туристътал ила бичаврил, республикалийн цал бувкIми ялагу зана бикIлай бушиврул, бувкIцириннан дакI дакьлакьисса тIалавшинна духьувкун, цIусса каферду, ресторанну тIитIлай бур, миллатрал дукрарду дуллалиссагу тIитIлай бур. МуницIухва, туристътурансса маршрутругу гьарза хъанай дур.
Экскурсиярдал программа хъун хъанахъавриву дуссар цамургу ххуйшиву: халкьуннал канил пагьмурдал сянатирттал сийгу гьаз хъанахъиссар. Туристътал бартбисуртту буллалисса, тIахIунтту дуллалисса, арцу-мусил чIюлушиннарду дуллалисса цехирдавун биллай бур, биян ччишиву буслай бур. Ва иширалгу канил пагьмурду бусса усттартал давуртту дуллали буллалиссар, хъамабитала шавайсса пишарду цIу буккан буллалиссар.
Вай циняв хIуччарду хIисавравун лавсун, агьалинал маэшат туризмалул гьаз бувансса шартIру дур. ХIаллицIух, республикалул цIа-кьини дюхъантIиссар, Аьрасатнал ца яла хьхьичIунмур, хъамал ххирамур ва колорит ядурмур регион хьунтIиссар. Ххуллугу, хъитгу миккунни.
ПатIимат Рамазанова
