Январь: Украиннал ясирну
бувгьуминнащалсса самолет руртунни
Белгородрал областьрай, Яблоново тIисса шяраваллия арх бакъасса кIанай, январьданул 24-нний ВСУ-лул ракета итадаркьуну, Аьрасатнал самолёт Ил-76 руртссар. Самолетрай ивкIссар 74 инсан, вайннавух баххана бувансса Украиннал 65 аьраличу-ясиргу.
Февраль: Авдеевка тархъан баву
Аьрасатнал аьралитурал февральданул 17-нний ВСУ-лул ца яла агьаммур кIану – Авдеевка тархъан бувссар.
Март: Аьрасатнал
президент увчIуссар
Мартрал 15-нний дайдирхьуссар Аьрасатнал президентнал 8-чинсса бувчIавуртту. ЧIурду булун бувкссар хъинну чIявусса агьали, 87 процент агьалинал чIурду буллуссар Владимир Путиннухлу. Инаугурация хьуссар майрал 7-нний.
Апрель: Нагорный
Карабахнава аьрал буккан бувссар
Апрельданий Аьрасатнал дайдирхьуссар Нагорный Карабахнава аьрал буккан буллалисса даву. Аьрасатнал аьрал тикку бивкIссар 2020-ку шиная шийнмай, Карабахнал 2-мур дяъви къуртал хьуну мукьах.
Май: Словакиянал премьер-министрнайн бивтссар
Гандлова тIисса шагьрулий, Культуралул къатрал чIарав, майрал 15-нний кIул акъасса инсаннал Словакиянал премьер-министр Роберта Фицо оьрмулуцIа увансса кьасттирай мунайн цIу дирхьуссар, 4 ккулла щурчагу, политик ххассал хьуссар. Биту лявкъуссар премьернал муттаэтурал партиялул тарап дургьусса, 71 шинал оьрмулувусса чичу Юрай Цинтула, Фицол коррупциялийн къарщисса законну хIура дуваврия ва Украиннан ярагъ булун махъаллил шаврия къарязисса.
Июнь: Европарламентравунсса бувчIавуртту
Июньдалий хьуссар Европарламентравунсса бувчIавуртту. 10 инсаннал Европарламентрал председательну цIарду рирщуссар, Урсуля фон дер Ляйеннуща къуллугъ канища буккан къабитан хьуссар.
Июль: Великобританиянаву лейбористътал ххув хьуссар
Июльданул 4-нний Великобританиянал парламентравунсса бувчIавуртту хьуссар, 14 шинал лажиндарай хIура къавхьусса консерватортурал иш багьссар, Кир Стармер каялувшиву дуллалисса Лейбористътурал партия ххув хьуссар.
Июль: Дональд
Трамплуйн бивтссар
Пенсильвания штатрайсса митинграй Американал президентнал къуллугърайн цIа рирщусса Дональд Трамплуйн бивтссар, ца ккулла мунал вичIилухун щуссар. 1972-ку шиная махъ укунсса, Президентнайн бивтсса, иш хьуну бакъар тайннал тарихраву.
Июль: Байденнул кандидатура
дуркьссар
США-нал президент Джо Байденнул баян бувссар, Американал президентнал къуллугърайнсса кандидатура дукьлай ушиву ва цахлува вице-президент Камала Харрис маслихIат буллай ушиву.
Август: дуснакьлувтал баххана бувссар
Августрал 1-нний Аьрасатнал дуснакьлувтал Магърибуллалминнащал баххана бувссар, 8 инсан зана увссар Аьрасатнавун. Аьрасатналгу 16 инсан кьатIаллил билаятирттайн зана увссар.
Август: Франциянаву Дуров увгьуссар
ВК ва Telegram каналлу хIасул дурсса Павел Дуров увгьуссар Франциянавусса Ле-Бурже аэропортрай.
Сентябрь: «Хезболла» дастталугърал бакIчи оьрмулуцIа увссар
Сентябрьданул 27-нний Ливаннай «Хезболла» дастталугърал бакIчи Хасан Насралла оьрмулуцIа увссар. Израильнал аьралуннал ва яхъанахъисса Бейрутрайн самолетрая ттупру бивчуссар. Насраллащал архIал ванал 20 уртакьгу, 33 тахсир бакъасса инсангу оьрмурдацIа хьуссар.
Октябрь: Угледарь
тархъан бувссар
Октябрьданул 1-нний Аьрасатнал аьралуннал Донецкалийсса Угледар шагьру тархъан бувссар.
Октябрь: БРИКС-рал саммит
Октябрьданий Къазаннай хьуссар БРИКС-рал билаятирттал хъуними бавтIсса саммит. Ваний гьуртту хьуссар 30 билаятрал вакилтал. Татарсттаннал хъуншагьрулийн увкIссар ООН-далул генеральный секретарь Антониу Гутерриш. Яла хъунмур делегация бувкIссар Китайнава.
Ноябрь: Трамп США-нал президент
Ноябрь зурул 5-нний хьуссар США-нал президентнал бувчIавуртту. Дональд Трамп увчIуссар президентну. 1892-ку шиная шийнай ва хъанахъиссар, перерывгу дурну, цIунил президентнал къуллугърайн лавхъсса цалчинма.
Ноябрь: Аьрасатнал ядерная доктрина
Аьрасатнал президент Владимир Путиннул ядерная доктриналул цIусса редакция цIакь бувссар. Ядерный нигьачIаву дакъагу, цамур журалул нигьачIаву Аьрасатнан дусса ппурттувугу, ядерный жаваб дулунсса ихтияр Аьрасатнахь душиву цIакь бувссар.
Ноябрь: «Орешник»
ракеталул
хIал ккаккаву
Ноябрьданул 21-нний кIюрххил Аьрасатнал аьралуннал цIусса ракеталул хIал ккавкссар. Вара кьини президент Путиннул баян бувссар ва хъинну дирисса бущилий ссур шайсса ракета уттизаманнул ПВО-лул ва ПРО-лул иширттахьхьун къадирияйсса душиву.
Декабрь: Сириянаву власть даххана
хьуссар
Декабрьданул 8-нний Сириянал хъуншагьру Дамаск ярагъуннил балгусса оппозициялул вив лавсъссар. Президент Башар Асад кулпатращал Аьрасатнавун ливхъссар.
Декабрь: Керченнал проливрай танкердал аварияртту
Декабрьданул 15-нний Аьрасатнал 2 танкерданул, «Волгонефть-212» ва «Волгонефть-239», Керченнал проливрай гьавалул тагьар сававну, авария дурссар, жамирду сайки кIибувхъссар, хьхьиривун экьиларгссар навтлил продуктылул 9-хъул тонна. Мазут Краснодардал крайрал зума-къирагъирдайнгу бивссар, хIакьинусса кьинигу волонтертал хьхьирил зумарду мазутрацIа марцI дуллайнма буссар.
ХIадур бувссар
П. Рамазановал
