ЦIуссаккуллал 2-мур школалул выпускница Ххадижат АхIмадова лайкь хьунни бусравсса наградалун – Дагъусттаннал бакIчинал чIумуйнусса кIанайма Федор Щукиннул чулухасса 100 азарда къурушрансса сертификатран.

Ларайсса ккаккиярттащал школа къуртал бувсса оьрчIру-душру лахъа-хъун буллалисса шадлугърал мажлис хьунни июль зурул 20-нний «Россия-моя история» тIисса тарихрал паркраву. Шикку гьуртту хьунни республикалул къуллугъчитал: Дагъусттаннал бакIчинан кIанайсса Федор Щукин, Халкьуннал Мажлисрал председатель Заур Аскандаров, Дагъусттаннал ХIукуматрал председателть Рамазан МахIаммадов, Дагъусттаннал ХIукуматрал председательнал хъиривчунал чIумуйнусса кIанайсса Муслим Телякавов, Дагъусттаннал кIулшивуртту дулаврил ва элмулул министрнал чIумуйнусса кIанайсса ЯхIия Бучаев.
Мажлисрай дуккавриву ларайсса ккаккияртту чIалачIи дурсса выпускниктуран дуллунни арцуйнусса сертификатру. Наградартту ларсунни ЕГЭ-рдай 100 баллу лавсъсса, Щалагу Аьрасатнал олимпиадарттай хьхьичIунсса кIанттурду бувгьусса, мукунма ГИА-дай кIира ягу ххишаласса экзаменнан 95-99 баллу лавсъсса оьрчIан ва душвавран. Миннавух бур химиялул ва биологиялул экзаменнан 95 балл лавсъсса Ххадижат АхIмадовагу. Ххадижатлул укунсса ккаккияртту чIалачIи дан хъунмасса захIматрал бутIа бивхьуну бур ванил учительница Амирова Сапижат МахIаммадовналгу.
Барча тIий буру Ххадижатлухь, ванил нитти-буттахь ва Сапижат МахIаммадовнахь ларайсса награда!

Андриана Аьбдуллаева