Вай гьантрай Лакрал театрданулгу, щала миллатралгу ялун бивунни ххарисса хавар.
Лакрал театрданул хъунама режиссер ва хьхьичIунсса актёр, Дагъусттаннал халкьуннал артист Аслан МахIаммадовлун Аьрасатнал лайкь хьусса артистнал цIа дуллалисса Аьрасатнал Президент Владимир Путиннул къулбас дурсса Указ бувккунни.
Мяйжаннугу, щала миллат ххари хьунсса иш!
Зувиннийн дирсса шинну хьуну дунуккар ва ларайсса цIа лакрал миллатрал дянив щилчIав къаларсун. Жула хъунасса артист Садикь МахIаммадовлуя мукьах щилчIав ларсъсса ххай бакъара.
МукьцIалуннийн дирсса шинну хьуну дур Аслан МахIаммадовлул республикалул театрал магьирлугъ хьхьичIуннай даврил ххуллий зий, захIмат буллай. Ва ур Лакрал театрданул пахругу, ттарцIгу.
Ванал давурттан, актёрналсса хьуннав, режиссерналсса хьуннав, лавайсса пишакаршиврул пачат бивщуну бур билаятрал хьхьичIунсса театрал критиктурал. Лавайсса кьимат бивщуну бур ванал гьунарданун миллатралгу. Лайкьсса кIану бугьлай бур миннул так ца Дагъусттаннал бакъасса, щалагу Аьрасатнал ттизаманнул сахIналул дунияллий.
Ванал творчествалул хазна авадан хьуну бур арулцIалуннийн дирсса яргсса ва дакIний личIансса рольлал — Сурхай-ханнал ва Къаратлул ЦI. Камаловлул «Хан Муртазяли» спектакльдануву, Жадов – А. Островскийл «Аьгъу кIану», Альбер – А.Пушкиннул «Бахилсса багьадура», Хлестаков – Н.Гогольлул «Ревизор», Малла Насруттин ва чIярусса цаймигу артистнал хIасул дурсса ларайсса художествалул сипатру лайкь хьуну дур жула республикалул, Аьрасатнал ва дунияллул халкьуннал дянивсса фестивальлал дипломирттан.
Му бакъассагу, Аслан МахIаммадовлул бивхьуну бур мукьцIалунниха ливчусса спектакльлу. Вайннувасса цаппарасса («Бернарда Альбал къатта», «Ччаву ва макь», «Оьтту ва макь», «Ккурккуллал Щаза») лайкь хьуну бур сий дусса фестивальлал дипломирттан: «Лучший спектакль», «За лучшую режиссуру».
ДакIнихтуну барча тIий жуна ххирасса ва бусравсса Аслан МахIаммадовлухь ларайсса цIа, чIа тIий буру ванан ттигу чIярусса шиннардий Лакрал театрданул сий бюхттул дуллансса, тамашачитал ххари буллансса цIуллушиву ва тIайлабацIу!
