Ва ссутнил гьарца алхIат­кьини лакрал щархъал жагьилтал ци дуллай бикIайссарив кIулссар цинявннан. Гьай-гьай, футболданий буклай.

Сентябрьданул 13-нний байбивхьусса «Лакку кIанттул Лигалул» («Лига Лакии») 11-ми тIуркIурдал ряхра нюжмар – ряхра алхIаткьини махъ лирчIунни. АцIния цалчин хъанахъисса «Лакку кIанттул Лига» щаллу хьун буванугу, чIири-хъунсса хIасил дуваннив бучIир.
«Лига Лакии» хъанай дур лакрал шяраваллал дянивсса футболданул хъунмур турнир. Гьашину ваний гьуртту хъанай дур 31 команда. Вай цирдагу дарчIуну дур кIива дивизиондалийх, кIива лигалийх. Суперлигалий дуклай дур 12 язисса команда. Вайннувугу цIана хьхьичI дур фаворитътуран ккаллисса Ххутрал, Ккуллал ва ЦIуссаккуллал командартту.
– Цалчинмур дивизиондалуву командарттал ялун личин буллалиссар ххув хьума ва призертал. КIива группалул лагрулий хъанахъисса бяст-ччаллаву хьхьичIун бувкми лажин лажиндарайнну хьунабакьинтIиссар декабрьданий хьунтIисса финалданул этапрай, – буслай ур «Лакку кIанттул Лигалул» Сакиншиндарал комитетрал каялувчи, Шахьуйннал шяраваллил футболданул командалул капитан ЖахIпаров Руслан.

 
– Цалчинмур дивизиондалуву хьхьичIунну дуклай дур Хъусращиял ва Гъумучиял командартту. КIицI лаган ччива кIилчинсса жагьилшиврувун дурхсса Ккуллал командагу. Гьужумрайсса, атакалийнусса футбол ккаккан буллалисса, бивщуми-щуми бакъа хьхьичIунмай нанисса «Столичный» футболистътураллив лапва махIаттал буллай буру, – буслай ур Руслан.
ТIааьнни цIусса цIарду, жагьилсса игроктал ялун личлачавугу. Командарттаву къачансса бур лакрал жагьилтурал дянивсса футболданий гай цалчинми тIуркIурдая шинмай буклакиминнал оьрчIругу. Ва ссуттилгу мукунминнал чIярусса дебютру хьунни. «Лакку кIанттул Лига» яла-яларив, спорт машгьур даврицIун, лакрал жагьилтурал дянивсса арарду цIакь дуллалисса давунугу хъанай дур.
– Такну ца шяраваллилгу, аьмну лакрал шяраваллалгу, лакрал халкьунналгу дянивсса дусшиврийсса арарду, никирттал дянивсса дахIаву цIакь даву – вари жул турнирданул агьаммур мурадвагу. Ва щаллу хъанахъаву, турнирданул сий, ванихсса ургъил, къулагъас ларай хъанахъавугу хъинну тIааьнни. Футболданул майданнивсса ва трибунардайсса дусшиврийсса атмосферагу хъунмур атрибутну хъанай дур. Шяраваллал инсантурал чулухасса цалла-цалла командарттал чулухуннайсса къулагъас, чIарав бацIаву (арцуйнуссагу) ялу-ялун ларай хъанахъаврилгу дакI ххари дуллай дур. Ччива шяраваллал каялувшиннардил, администарциярттал цалла-цалла шяраваллил жагьилтурал спортравусса шаттирду цала аякьалулун лавсунгу, – тIий ур Руслан.
ЧIа учинну жулва футболистътуран тIайлабацIу. Ххувгу хьуннав цIакьма, гужма. Вамур чулухагу, кIулсса куццуй, спортраву агьаммур му ххувшаву дакъарча, гьуртту шавур.
Бадрижамал Аьлиева