Тагьар къулагъасралу дур
Зунттал районнай бацIаву дакъа буллайнма бур хъунисса марххалтту, лачIлайнна дур рирщу гъараллу. МуницIун бавхIуну хъуннасса нигьачIаву дур лахIунтту, валтру дагьаврия ххуллурдангу, миннуцIухсса къатрангу.
Хъунисса зараллу хьуну бур ххуллурдайн кьунтту зивзуну, хъяхъа куну, ттукIрал тталлу кьатI хьуну, ххаллу руцари хьуну. Архми шяраваллавун тIурча, ххуллурду зунчардил бава-бавщуну ми бакьин бансса, ттукI буцинсса техника гьан-дучIан къахъанахъисса тагьарданий бур.
ХIасул хьусса тагьарданий бивсса зараллу бухлаган бансса, шяраваллал агьалинан кумагрансса чаранну лякъинсса суаллу ххал бивгьунни Лакрал райондалул бакIчи Зураб КуччаевлучIа хьусса анаварсса батIаврий.
ГО ЧС-рал отделданул, ххуллурдал идаралул, электросетирдал зузалтрал баян бунни кIантту-кIанттурдайсса тагьардания.
Администрациялул зузалт бивунни щархъавун, ххал дунни тагьар. ЦIанасса чIумал марцI буллай бур ххуллурду. Базлай бур ттукI, гьан-бучIан захIматсса щархъавун биян буллай бур ихIсандалул фондирттал чулухасса гуманитар кумаг.
Ххюлуссуннал шяраву
Тталаткьини хьхьувай, Ххюлуссуннал шяраваллил ялттусса зунттуя ца метра утташиврийсса лахIуни дурцусса бавну, кIихун тагьар ххал дан ивунни райондалул бакIчи Зураб Куччаев.
ЛахIуни ялун диян кунна чIалачIисса ацIния цава къатлува агьали чIумуйнусса гъанчуначIан, шяравучутурачIан бизан бунни.
АрвахIкьини шяравун тагьар ххал дан бувкIунни республикалул МЧС-рал министрнал хъиривчу Элдар Атаев бакIчийсса комиссия. Делегациялуву бия ТIабиятрал ва строительствалул министерстварттал вакилтал, «Госэкспертиза проектов» ГАУ-лул директор Шамил Аскаров. Вайннал ххал диргьунни цIанасса чIумалсса тагьар. Ялугьлай бур лахIуни дагьлагьисса кIанттай экспертиза дансса пишакарттурах.
Нех дуккаврия нигьачIаву дакъар
Ларгсса нюжмардий цаппарасса Телеграм каналлай бувккун бия Лакрал райондалий Хъунайннал ва Аьхъардал шяраваллал дянивсса зунттул ххярагьала дагьну, нех ялтту най, зумакъирагърайсса шяраваллан нигьачIаву дур тIиccа авазартту.
Мунил ялув муниципалитетрал каялувчинал хъиривчу Малик ХIусмановлул бувсунни тагьар шяраваллан нигьачIисса дакъашиву. Администрациялул зузалт тIабиаьтрал апатI хьусса кIанттурдайн ялтту буккан лавгшиву. «Арчуттиял шяраваллил тия чулийсса зунттул ххярагьала ацIния ххюра метраксса яларай неххавун леркьун дур. Нех дарщуну дакъар, лахIунттул тиха ва шиха цила ххуллийх най дур», – увкунни Малик ХIусмановлул.
Зулайхат Тахакьаева
