ХIакьину Гъумук тIитIлатIиссар цIусса детсад

ХIакьину шагьрурдаясса чIявусса бусравсса хъамалгу бувкIун Гъумук тIитIинтIиссар 120 оьрчIансса цIусса детсад.
Ттизаманнул тIалавшиннар­дацIун даркьусса, шартIру къулайсса, мюхчан дурсса кIира зивулийсса детсадрал къатри дур­ссар «Демография» тIисса республикалул инвестицион программалул лагрулий. Шиккува кIицI бан, лахъсса зунттал районнайсса царагу шяраву уттинин дакъассар укун ттизаманнул тIалавшиннардацIун даркьусса детсадрал къатри.

Детсадрал цIусса къатрая буслай ур прораб Алхулаев ХIа­жикьурбан Рамазаннул арс.
Къатри дуллай байбивхьуну бур 2022-ку шинал январьданий.
Генподрядчик — ООО «Дагсвязь инвест», субподрядчик ООО «Дорстрой».
ХIажикьурбаннул бусаврийн бувну, къатраву бивхьуну бур чани левщуний лахъавансса дизельданий зузисса генератор, щин салкьи дайсса кьаллу, дурну дур щин марцI дайсса сооружение. Нузру тIитIиннин къатраву зузи дурну дур лифт, дузал дурну дур гъилишиву, отопление зий дур Италиянава бучIан бувсса кIива котелданий.
Проектрайн бувну, цIусса къатраву дузал дурну дур оьрчIал мюхчаншиву дуруччинсса ва оьрчIру итххяххан баврин къулайсса шартIру.
Детсадрал къатраву зун тIий бур пищеблок, медкабинет, физкультуралул ва музыкалул дарсирдансса заллу, оьрчIру школалийн хIадур баврин аьркинмунил лащу-щаллусса хасъсса кабинетру, логопедический ва методический классру. Дур илкинсса хIаят, шивугу бур беседкарттащалсса оьрчIру бялахъансса ряхва площадка.

Асфальт бакьлай бур цIусса махIлалийсса ххуллийх

Махъсса шиннардий цIу-цIусса къатри дуллай, хьхьичIунмай хьуну най бур Гъумучату ШавкIуллал чулийнмайсса цIусса махIла.
2013-ку шинал ши­кку тIир­тIуссар республикалул зунттал районнай уттинин къадиркIсса журалул РОВД-лул къатри, 2021-ку шинал тIивтIуссар цIусса ттизаманнул журалийсса 600 дуклаки оьрчIансса школа, хIакьину тIитIлай бур 120 оьрчIансса цIусса детсад, къуртал давай дур цIусса азарханалул къатри. Ва хIасул хьуну дур шикку цIусса микрорайон. Школалийн заназисса оьрчIан, шикку ялапар хъанахъисса агьалинансса къулайшиндаран райондалул бюджетрава арцу итадаркьуну, байбивхьуну бур паччахIххуллийн тIайлану, школалул, РОВД-лул къатрал ва азарханалул ялтту нанисса ххуллийх Гъумучиял базаллучIату цIусса детсадрал къатрачIансса ххуллийх асфальт бутIлай.
Райондалул администрациялул бакIчинал хъиривчу Абубакар Къюннуевлул бусаврийн бувну, асфальт бакьин тIий бур паччахIххуллия ялттуххуллийн нанисса къатрал махIлардал дянихсса ххуллул бутIрайхгу – аьмну асфальт бутIин тIий бур 5 километралийх.
Вай давуртту дуллай бур Лаващавсса ххуллурдал идаралул зузалт.

Буллай бур Гъумучату Буршайнсса ххуллу

ДР-лул Транспортрал ва ххуллул хозяйствалул министерствалул паччахIлугърал программалул лагрулий Лакрал райондалий бакьин буллай бур Гъумуча Буршайн нанисса ххуллу.
Ва бур республикалул агьамшиву дусса «Мамраш – Ташкапур – Араканский ламу» ххуллийн буклакисса, кIанттул агьамшиву дусса, райондалул шяраваллурду райцентрдануцIун дахIлахIисса ххуллу.
Уттинин дакьин дурссар ва ххуллул Ххюлусмав бияннинсса 11 километралийхсса участок.
Ххуллий зий бур Мурад Ма­хIадовлул каялувшиндаралусса «Ариэл» ООО-лул зузалт.
Участокрал ялув авцIусса ГъазимахIаммад Сайкуевлул бусаврийн бувну, ххуллу буллай байбивхьуну бур 2023-ку шинал. Реконструкциялул лагрулий ххуллу бур утта бувну, гьану цIакь бувну, зунххи дикIрурду кьаралданийн дурцуну, щин экьидачинсса турбарду бивхьуну, ххяли лекьан кунмасса кIанттурдай дурну дур бетондалул дайгьузанну.
ЛивчIун бур ххуллийн ххюл бичин. Муния махъ ххуллул мюхчашиву дуруччинсса давурттугу: дишин ххуллул лишанну, нигьачIисса кIанттурдай дацIан дуван лишанну. ЦIанасса чIумал объектрай най дур аьрщарал давуртту, архIалва буллай бур ламу. АцIния цара километралийхсса ххуллул бутIа бакьин бувну къуртал хьун тIий бур ва зурул ахирданийннин.

Ххюлусмату Гъумукун буллай бур цIусса щинаххуллу

Махъсса шиннардий марцIсса хIачIай щин диял къахъанай азурда хъанай бур Ххюлусмату-Гъумукун бивхьусса щинаххуллул дузал буллалисса щархъал агьали. Шивун духлай дур ЧIурттащиял, Читтурдал, КIулушацIрал, ШавкIуллал, ГьукIурдал ва ТIулизуннал шяраваллу. Республикалул инвестицион программалул лагрулий гьашину сентябрьданий байбивхьуну бур Ххюлусмату Гъумукун нанисса щинаххуллу бакьин буллай.
Зий бур шикку: Рамазан Исяев (прораб), МахIаммад Шяъванов, Хъювхъатусса ОьмархIажи ЦIаххаев, Хъусращатусса Рамазан Муслимов, ЧIя­тусса Микьдат Щамххалов, ТIюхчаратусса Абакар Табиев.
Ххюлусмату Гъумукун нани­сса щин гьарца гъарал ларчIтари оьлухълай дусса дур щинаххуллул турбарду аьвну бушиву сававну. Вай турбарду цинявппа цIу бан багьлай бур. Гьамин, ва ч1умал лавсун бувкIун бия кIийн цIусса турбарду. ЦIанасса чIумал щириркIуну най дур щинаххуллу буклакисса давуртту.

Зулайхат Тахакьаева