Ккуллал райондалий дуссар АхIмад- Ханнул буттал Султаннул шяравалу. Му цурдагу 1-мур ЦIувкIуллал шяравалур. Гьашину октябрь зурул 25-нний бартлаглагиссар жула Виричунан 100 шин. Мунияту Ккуллал райондалул шяраваллал культуралул къатраву, школардай, жяматирттал дянив хьунни мунин хас дур­сса личIи-личIисса шадлугъру.

---

ЦIувкIуллал шяраву

Октябрь зурул 17-нний райондалий хьунни Дагъусттаннал цIанихсса арснан хас дур­сса шадлугъру. Ми дайдирхьуна 1-мур ЦIувкIуллал шяравату. Шиккун, Виричунан гьайкал дацIан дур­сса махIлалийн, бувкIуна райондалул бакIчи Шамил Рамазанов хьхьичIну, администрациялул зузалт, идарарттал каялувчитал, шяраваллал бакIчитал ва цаппара школардал дуклаки оьрчIру. Вай цачIун хьуна 1-мур ЦIувкIуллал школалул чIарав. Яла мичча, ттугъругу лавсун, Виричунал суратирттащал бавчуна гьайкалданучIан. Ва махIлалий чIиртталух щябивкIун бия хъинну чIявусса инсантал. Бия шагьрурдая бувкIсса биялсса жагьилталгу. Гьайкалданул хьхьичI Виричунан 100 шин шаврин хас дур­сса митинг тIитIлатIишиву баян бувуна Цалчинмур ЦIувкIуллал школалул директор Муртаев Аьбид­лул. Яла махъру лавхъуна райондалул бакIчи Шамил Рамазановлул, профе­ссор, цIувкIрачу МахIаммадбаг ХIусайхановлул ва цайминналгу. Виричунал гьайкалдануцI бивхьуна тIутIал кац1ру ва шалкка . КкурчIав дия зюннав-дачIу рирщусса тяхъашиврул гур.

ЧIяйннал шяраву

Шяраваллил культуралул къатравун бавтIминнахь Виричуна­л оьрмулия кутIану бувсуна Культурал къатрал хъунмур Алхасова СалихIатлул. Гьуртту хъанахъи­сса ЧIяйннал школалул оьрчIал -Мудунов Валиаьбдуллул, Мяммакьурбанов Сулайманнул, Билалова ПатIимал ва цайминналгу дурккуна АхIмад-Хан Султаннун хас дурсса декламацияртту, увкуна балайрду, бивзуна къавтIун. Хьуна цаймигу тяхъашивуртту.

Райондалул библиотекалий

Шикку хьунни Ваччиял школалул мяйлчинмур классрал каялувчи МахIаммадова Аьйшал каялувшиврийнусса мероприятие. ОьрчIал дурккунни Виричунан хас дурсса личIи-личIисса декламацияртту, бувсуна ганал оьрмулия.

Райондалул Культуралул къатраву

Шикку хьунни АхIмад-Хан Султаннун хас бувсса балайрду учаврил ва къавтIаврил конкурс. Муний гьуртту хъанай бия школалул оьрчIру ва бугьарасса инсантал. Конкурсрал ахирданий жюрилул буллунни кIанттурду.
Школалул оьрчIаву: 1-мур кIану – МахIаммадова ПатIима (Вихьуллал школа), 2-мур кIану – Даллаева Шахьсалан (Хъусращиял школа), 3-мур кIану — Рамазанова ва Рабаданова (2-мур ЦIувкIуллал школа). Бугьараминнаву: 1-мур кIану – Зуллуева Сиясат (Ккул), 2-мур кIану — Илдарова Шавлухъ (ЧIяйми), 3-мур кIану – Муслимова Нурижат (Ваччи).

Ваччиял шяраву

Ваччиял хъун майданний хьунни АхIмад-Хан Султаннун хас дурсса тяхъашивуртту. Виричунал гьайкалдануцI тIутIив дирхьуна къуллугъчитурал. Виричунал оьрмулия махъру лавхъуна: Ккуллал райондалул бакIчи Шамил Рамазановлул, ДГУ-рал профессор МахIаммадбаг ХIусайхановлул, Дагъусттаннал КIулшиву дулаврил министерствалул зузала Лаура Кьурбановал, аьрали къуллугъ кьабивтсса майорнал чиндалул заллу Щамхал Хизриевлул . Гания гихунмай райондалул культуралул зузалтрал ва МахIачкъалалия бувкIсса артис­турал ккаккан дурна хъуннасса концерт. Вай цинярда давур­тту дачин дурну ия Хъусращиял шяраваллил халкьуннал театрданул режиссер Марсел Сулайманов.
Майдандалул дязаннив кка­ккан бувна хьхьуттайх заназисса номерду. Бия майданнив спортрал бяст-ччаллугу: пут, чару личаву. Лехлай дия вертолетгу. Бия хаварду десант бичинтIиссар тIиссагу, ттуннив янилун къабагьуна. Тяхъашивуртту лахъи ларгуна 3-4 ссят­райсса.