Райондалул бакIчи ивунни Карашав ва Кумав
Лакрал райондалул бакIчи Зураб Куччаев даврил аьрххилий райондалийсса сайки гьарца шяравун иллай ур, шяраваллал бакIчитуращал ва жяматирттащал хьунаавкьуну, кIани-кIанайва кIул буваншиврул диял къахъанахъимур, щаллу дуван аьркинмур.
Ва ххуллухь райондалул бакIчи ивунни Карашав ва Кумав.
Карашрал шяраваллил бакIчи Аьбдуссамад Шабановлул бувсунни Зураб Куччаевлухь шяраву ци тагьар дуссарив, социал объектирдал даву ци даражалий дуссарив. Райондалул бакIчи ивунни шяраваллил администрациялийн, школалийн ва ФАП-райн.
Кумиял шяраваллил бакIчи Зиябуттин Чавтараевлул увцунни Зураб Куччаев шяравусса социал агьамшиву дусса объектирдайн. Вания махъ Зураб Куччаевлул шяраваллил школалий дунни совещание. Ваний гьуртту хьусса педагогтурал, шяраваллил жяматрал бувсунни райондалул бакIчинахь дуккаврил давугу, аьмну шяраваллил мурадругу хьхьичIунмай хьуншиврул щаллу дуван аьркинмуния.
Щардан – цIусса трансформатор
Щардал шяраву ттинин бивкIун бур 100 кВА бусса бухсса трансформатор. Пландалийнусса давурттайн бувну, тти шикку 160 кВА бусса трансформатор бивхьунни.
МяйцIаллий мяйлчинсса къери
КIира шинни Гъумучиял оьрчIал искусствардал школалий СВО-райсса аьралитурансса маскировочный къертту щашлашисса, Лидия Кьурбановал каялувшиндаралусса площадка тIивтIуну. Декабрьданул 5-нний кIицI лагайсса Волонтернал кьинилул хьунин шикку дурну щаллу хьунни 88-чинсса къери.
ДакIнин бутан, Лидия хъанахъиссар МахIачкъалаливсса Расул ХIамзатовлул цIанийсса Национальный библиотекалий цил база бусса «Диалог» сакиншиндарал хьхьичIунсса волонтер. Шагьрулийгу, Лаккуйгу зий, Лидал усттарсса каруннила аьралийтуран кумагрансса цимирагу къеригу, снайпертурансса костюмругу, цайми-цайми затругу дуркссар. Лида цуппагу лавгссар СВО-райн гуманитар кумаг биян буван.
