Июнь зурул 20-нний Поэзиялул театрдануву хьунни «Илчилул» редакциялул Ххувшаврил байрандалун хас дурсса назмурду дуккаврил конкурсрай ххув хьуми, хьхьичIун ливчуми барча буллалисса шадлугъ. Ши­кку Лаккуя, ЦIуминалия, республикалул шагьрурдая бувкIсса бия.

Мероприятие дачин дур­сса Дагъусттаннал Чичултрал союзрачIасса лакрал секциялул хъунама Супиян Оьмаровлул кIицI лавгуна, «Илчилул» конкурс лакку маз яшаврил ххуллийсса даву душиву. Хъиндайдихьу дуллалисса махъ лахълай, «Илчилул» хъунама редактор Руслан Къардашовлул кIицI лавгуна, уттисса заманнай, кказит итабакьаврийну, сайтирдаха зузаврийну гьашиву къадурну, цаймигу ххуллурду ва чаранну ляхълангу, ишла буллангу багьлай бушиву оьрчIан ниттил маз лахьхьиншиврул, ябуваншиврул. МуницIухва, гьунар бусса оьрчIру ялун личин бувансса давугу хьунссар тIисса ниятрайгу сукку хьушиву. Барчаллагь увкуна конкурсрал спонсоршиву дурсса Кисловодскалиясса ишбажаранчи Сиражуттин Къардашовлухь ва Халкьуннал Мажлисрал депутат Марат Илиясовлухь, конкурсрай гьуртту хьуцириннахь, вай хIадур буллай захIмат бивхьусса нитти-буттахь, учительтурахь.

Конкурсрай 1-мур кIану бувгьусса Щардал школалул 3-мур классрал дуклаки оьрчI Кьурбан Ибрагьимовлун хъунама редакторнал цалва буллуна дипломгу, премиягу – 10 000 къуруш. Ца ялагу 1-мур кIану бувгьусса Щардал 10-мур классрал дуклаки душ Амина Ятуеван диплом ва премия дуллуна «Илчилул» хъунама редакторнал хъиривчу, Дагъусттаннал халкьуннал шаэр Руслан Башаевлул.

КIилчинмур кIану бувгьусса Чапаево шяравасса 4 шинавусса Аьшу АхIмадовансса премия ласун увкIун ия ванил буттал ппу, Чапаевкаллал школалул директор Камил АхIмадов. Ванахьхьун диплом ва арцуйнусса премия (5 азарда къуруш) дуллуна «Илчилул» журналист Имара Саидовал.
Шамилчинми кIанттурду бувгьуминнан дуссия шан-шаназарда къуруш ва дипломру. Шамилчинмур кIану бувгьу­сса Щардал шяравасса Самира Ибрагьимован бахшиш дуллай, филологиялул элмурдал канди­дат Роза Эльдаровал кIицI лавгуна цинма кьурчIи бизлай бушиву ялун наниминнаву ла­кку мазраха зузисса аьлимтал сайки бувагу бакъашиву, Дагъус­ттаннал университетраву лакрал отделениялийн махъсса 2 шинал лажиндарай цаягу оьрчI дуклан къаувхшиву. МаслихIат бувна конкурсрай гьуртту хьуминнан лакку маз лахьлан университетравун буххан, лакку мазрай шеърирду, хаварду чичлан хIарачат буллан.

Шамилчинмур кIану бувгьусса, вара Щардал шяравасса Мариджан Ибрагьимован, дипломгу, бахшишгу дуллай, жула жяматийсса ишккакку Шалласу Шалласуевлул увкуна: «Жува оьрчIру лакку мазрай гъалгъатIи буллай буссаксса, оьрчIру лакку мазрай шеърирду ккалай буссаксса, яхьунтIиссар маз. Барчаллагьри ва конкурсрал сиптачи Руслан Къардашовлун. Шаннагу райондалул хъунимигу кIункIу хьун аьркинссар ва давривун, гьар шинахсса форумрайн кIура даен дурну ва конкурсгу.

Шамилчинмур кIану бувгьусса, Гъумучиял шяравасса Алина МахIаммадован бахшиш дуллай, халкьуннал чичу Мирза Давыдовлул кIицI лавгуна миллатирттал кказит-журналлал подписка лащинсса тагьарданий душиву. Шамилчинмур кIану бувгьусса СунбатIуллал школалул дуклаки душ Мадина МахIадован диплом ва бахшиш дулун тапшур бувна «Илчилул» отделданул редактор ПатIимат Рамазановайн. Ккуллал шяравасса, МахIачкъалаллал 12-мур школалий дуклакисса Рамазан АхIмадовлун дипломгу, бахшишгу дуллуна «Дагестан» ГТРК-рал лакрал редакциялул хъунама редактор Тамара Закарьяевал. Ванилгу кIицI лавгуна оьрчIал назмурду дуккаврил конкурсру маз яшаврицIун кабакьу буллалисса ва гьунар бусса оьрчIру ялун личин буллалисса даву хъанахъишиву. Ккурккуллал шяравасса Аматуллагь Бар­ххулаеван дипломгу, премиягу дуллай, «Илчилул» отделданул редактор Андриана Аьбдуллаевал кIицI лавгуна Аматуллагь, ххуйну дуклай бушивруцIун, школалул оьрмулул иширттавугу чялишну гьуртту хъанахъисса, хьхьичIунсса душ бушиву, Ккур­ккуллал школа машгьурсса чичу Апанни Къапиевлул цIанийсса бушиву, Аматуллагьгу Къапиевхъал агьулданиясса бушиву.
Щардал школалул дуклаки душ Алжана Ибрагьимован дипломгу, премиягу дуллай, лакрал машгьурсса шаэр Булбул Оьмариевал кIицI лавгуна, дунияллийцири мазурдиву ниттил маз гьарманан яла аваданмурнугу, язимурнугу бикIан аьркиншиву. Дурккуна ванил пасихIшиврул даражалий цилла оьрчIан чирчусса назмурдугу. Шиккува бусанну, конкурсрай хьхьичIун ливчусса гьарцаннан Булбул Оьмариевал цилва чулуха бахшишран буллушиву «Ссурулккуртта» тIисса оьрчIансса назмурдал цилва лугу.

Мариян Илиясовал цIанийсса «Дараччи» фондрал цIанияту ххю-ххюазарда къурушгу, дипломругу буллуна фондрал хъунмур Гульшан Хасаевал. Ванил премия дуллуна 3 инсаннан: Хъювхъиял шяравасса МахIаммада Аьлиев­лун, КIундиннал шярава­сса Мариян Ибрагьимован ва Дюкъуллал шяравасса Ххадижа Байрамован . «Приз зрительских симпатий» хIисаврайсса премия дуллуна «Илчилул» журналист Бадрижамал Аьлиевал ва дизайнер Зинфира ХIажиевал ЦIуссаккуллал шяравасса Милана Чихунован . Вагу редакциялийн бучIантIиссар ласун.

«Инт» кафелул хъунмур Саидат Кьурбановал цIаниятусса, Щардал школалун цIа кусса премия (15 000 къуруш) ласун сахIналийн увккуна Щардал шяраваллил администратор Мирослав Ибрагьимов. Саидат Кьурбановал, цищава бучIан къахъанай, премия дулун тапшур бувну бия ПатIимат Рамазановайн. Ванил кIицI лавгуна Саидатгу, ванил коллективгу лакку маз яшаврил ххуллий мудангу чялишну зузисса бушиву. Мирославлул кулпатравасса оьрчIру цаннаяр ца бюхханну, пасихIну шеърирду ккалаккисса бушиврий тамаша буллалисса акъа акъая.
Мирославлул цала ихтилатраву увкуна: «Ттун чIалачIиссаксса, жува буру цIана, жула ниттил мазгу кьабивтун, цайминнал мазру лахьлай. Жува чIал хьуну чIалай буру маз ябан, ваниха багьайсса аякьа дуллан. Маз ябаншиврул гьарца кас цала шяраваллия, кулпатрая, цаятува айишин ур лакку мазрай гъалгъа тIий. Ялари маз ябан хьунтIисса ялун нанисса никиран! Мазгу, тарихгур миллатрал язими ххазинартту.
Хъусращиял школалул оьр­чIан чялишну конкурсрай гьуртту шаврихлу цилла чулухасса премия (7 000 къуруш) дуллай, «Илчилул» отделданул редактор Зулайхат Тахакьаевал кIицI лавгуна, бюхттулсса шаэртал лявхъусса Хъусращиял школалул дуклаки оьрчIал назмурду дуккаврил даву ххуйсса даражалийсса дикIан аьркиншиву. Барчаллагь увкуна цила шяравучув, хъунасса шаэр МахIаммад-Загьид Аминовлул назмурдах ххишаласса къулагъас дуллай бушиврухлу.
«Илчилул» журналист Залму АьбдурахIмановал, цилла чулухасса премия Бабаюртуллал райондалийсса (КIамахъаллал) Сангардал школалул дуклаки душ Баркьисат Маммаеван дуллай бушивугу кIицI лавгун, бувсуна Сангардал школалийгу ниттил маз лахьхьаврих мудангу къулагъас душиву, дуклаки оьрчIру ниттил мазран хас дурсса давурттавух чялишну хIала бу­ххайшиву.

Цалчинмур ЦIувкIратусса жяматийсса ишккакку Башир СантIуевлул цалла чулухасса премияртту ва дипломру буллуна цала шяравасса, МахIачкъалаллал 61-мур школалий дуклакисса ХIажимуса Мусаевлун ва Арслан Мустиевлун. Премияртту ласун увксса АбутIалиб Мустиевлул, Арсланнул хъунама уссил, бувсуна ХIажимусащагу, Арсланнущагу, цIана буттал шяраву буну, бучIан къавхьушиву. Баширдул цалла чулухасса премия дуллуна чIярусса шиннардий оьрчIансса рубрика «Илчи» кказитрай нани бувсса шяравадуш ПатIимат Рамазановангу.
«Ябувара жулва миллат» тIисса ватсап-группалул администратор, жяматийсса ишккакку Валида Исякьовалгу, ххуйсса бахшишру дурну, барча бувна цилва группалул гьурттучитурал наслу: МахIаммада Аьлиев (Хъювхъатусса), Мариян Ибрагьимова (КIундиятусса), Аьшу АхIмадова (Чапаевкалиясса) ва Щардал шяравасса Кьурбан, Самира, Мариджан ва Алжана Ибрагьимовхъул.

ВаницIун оьрчIру барча буллай, кумаг буллай бия вава кIицI лавгсса группалул цамургу администратор, хIакьсса патриот, историк, Шаллал шяравасса Басират Щамхалова.
Ихтилатру буллалицири, ца зумату кунма, кIицI лаглай бия, укунсса конкурсирттай гьурттушинна даву лакку маз ххирану, хьхьичIунну бушиву ккаккан буллалисса даву хъанахъишиву. ОьрчIру барча буллалисса шадлугърал сий хъун дурна Да­гъусттаннал халкьуннал артист ХIажиаьли ХIажиаьлиевлул, Дагъусттаннал лайкь хьусса артистка Загьидат Муслимовал, музыкант ва балайчи Руслан Оьмариевлул, балай учаврил гьунар бусса жул коллега Карина Далиевал.
Макьалагу къуртал дуванну Лакрал театрданул цIаниятусса барча баврийну: «Жугу гъирарай хъирив бавцIуну бивкIру ва конкурсрал «Илчилул» Телеграм-каналданий. Укунсса конкурсирттал, махъ бакъа, кабакьу буллалиссар оьрчIаву гьунарду аьч бангу, жулва миллатрал ирс буруччингу. Барча буллай буру конкурсрай ххув хьуми ва бахшишру ларсми. Конкурс, лавайсса даражалий сакингу дурну, тIайла дуккаврихлу «Илчи» кказитрал редакциялийнгу барчаллагьрай, умудрай буру, гьай-балики, вай оьрчIава Лакрал театрдануву зун учIанссагу лякъинхьуви тIий».

ПатIимат Рамазанова