ЦIуссалакрал райондалул лак цIусса миналийн бизан баврил ва Аухуллал район цIу дуккан даврил управлениелул хъунама МахIаммад-ХIажи Айдиевлул жул корресподентнащал бунни Программа бартдигьаврил хIакъиравусса ихтилат.
МахIаммад-ХIажи Айдиевлул бувсунни ДР-лул БакIчи Сергей Меликовлул Программа бартдигьаврих ва цIусса миналий биттур буван захIмат хъанахъисса масъаларттах хъуннасса къулагъас дуллай ушиву.
– ХIажи Шихамирович, циксса давуртту дуван бювхъур махъсса шиннардий цIусса миналий?
– ЦIусса миналийн бизаврил программа бартдигьаву мурадрай итадаркьуну диркIссар 2021 шинал 565 млн къурушру, 2022 шинал – 889,3 млн къурушру, 2023 шинал – 356,3 млн къурушру.
Миннух буван бювхъунни 620 кIану бусса 4 оьрчIал багъ Аьхъарав, ЦIуссалаккуй, ТIухчарав ва ЦIуссаккулув. Ялагу бувну бакIуйн буккан бувссар «Гранит» ООО-лул буллай бачIину ливчIун бивкIсса 55 къатта.
ЦIуссаккуллал 2-мур школалучIа бувссар блок-пристройка, къатрал ПСД, мукунна дурссар цаймигу давуртту. Вайннувасса ца хъанай дур ЦIуссаккуллал шяраву кIичIирттал ва ххуллурдал ПСД баву. 2009 ва 2021 шиннардий ЦIуссаккулув дуссия шяравалу щинахьхьун лагаврицIунсса захIматшивуртту. Мунийн бувну, УДС-рал (Улично-дорожная сеть) проект дагьан дурну диркIссар ДР-лул бакIчи Сергей Меликовлул АьФ-лул Федерациялул Советрайн тIайла бувксса захIматсса масъаларттал хIакъиравусса сияхIравун. Му проект бартдигьлай байбивхьуну бур. Му хъинну агьамсса проектри.
ЦIусса миналийн бизлазисса инсантал му ишираяту хъинну ххарину бия, ми барчаллагь тIий бия Сергей Меликовлухь.
«Реконструкция улично-дорожной сети с благоустройством и инженерными коммуникациями с. Новокули» тIисса объект буллай бур «Развитие Северо-Кавказского федерального округа» тIисса госпрограммалул лагрулий. Объектрал лагру дур 28,4 километра, мунил багьа бур 2,63 млрд къурушру.
– Цукунсса давуртту дуван ккаккан бувну бур му проектрай?
– Муний ккаккан бувну бур щин марцI дайсса сооруженияртту, гъарал щин лагайсса канализацияртту даву, щинаххуллул системалул реконструкция, ххуллурдал лувсса дренажрал сетьру, тротуарду, электросетьру ва связьрал сетьру даххана даву. Машинарттал ххуллурдайх бакьинтIий бур асфальтобетон, кучардай лахъан тIий бур чани.
– ЦIусса миналий чани чIявуну лешлашаврил масъалагу бикIайссия, цIана му чулийн буккан буллай буссарив?
– Мунихагу зий бур. ДР-лул БакIчи Сергей Меликовлул тапшурлугъру биттур даврил лагрулий ДР-лул ХIукуматрал Председательнал цалчинма хъиривчув Манвел Мажонцлул бартбигьлай ур ВЛ 110 кВ баврил масъала Шамхаллая ЦIуссалакрал шяравун биянцIа, миккува бантIий бур 110/35/ 10 кВ подстанциягу. Му масъала дузал шавай бур.
Уттигу цал кIицI бан ччай бур ЦIуссалакрал райондалийсса лак цIусса миналийн бизан баврил масъалартту бартбигьавриву ДР-лул БакIчи Сергей Меликовлул ва ДР-лул ХIукуматрал председатель Аьбдулмуслим Аьбдулмуслимовлул хъунмасса захIмат бивхьуну бушиву цIусса миналийсса лакрал шяраваллал жяматру хъинсса, къулайшивуртту дусса тагьарданий ялапар хъананшиврул.
ХI.Аьдилов
