Январьданул 10-нний Дагъусттаннал ХIукуматрал Председатель Аьбдулмуслим Аьбдулмуслимов хьунаавкьунни ЦIуссалакрал райондалийсса лак цIусса миналийн бизан баврил ва Аухуллал район уттара дуккан даврил Управлениелул хъунама МахIаммад-ХIажи Айдиевлущал.
Хьунабакьаврий республикалул премьер-министрнал вичIи дирхьунни «ЦIуссалакрал райондалийсса лак цIусса миналийн бизан баву ва Аухуллал район уттара дуккан даву» тIисса ДР-лул ПаччахIлугърал Программалий ккаккан дурсса давуртту бартдигьаврил информациялух.
Управлениелул хъунаманал бусаврийну, ва идаралул 2023 шинал сайки 100 % бартдиргьуну дур ПаччахIлугърал программалул давуртту ва харж дурну дур 2023 шинайн ми давуртту бартдигьин итадаркьуну диркIсса арцу. ДукIу Программа бартдигьин итадаркьуну дия 390 млн къуруширттал.
МахIаммад-ХIажи Айдиевлул бувсунни дурсса давурттал хIасиллаягу. Ванал тIимунийну, 2023 шинал Программалул лагрулий бувну бур 4 оьрчIал багъ – Аьхъарав, ТIюхчарав, ЦIуссалаккуй ва ЦIуссаккулув. Дузал бувну бур 150 цIусса зузи кIану.
Уттигу ца школа буван ккаккан бувну бур ЦIуссаккуллал шяраву. ХьхьичIва бувну бивкIсса ЦIуссаккуллал 2-мур школалуцIун дувантIий бур 604 оьрчIансса кIану бусса блок-пристройка.
Докладрах вичIи дирхьуну махъ Аьбдулмуслим Аьбдулмуслимовлул барчаллагь кунни Айдиевлухь ва мунал зузалтрахь мюнпатсса давурттахлу ва тапшур бунни мува бущилий дачин дуван Управлениелул ттинияр тихуннайсса давуртту.
Хьунабакьаврил ахирданий премьер-министрнал МахIаммад-ХIажи Айдиевлун дуллунни ДР-лул ХIукуматрал ХIурматрал грамота, хьун дурсса хьхьичIуннайшивурттахлу ва юбилейрацIун дархIуну.
ХIадур бувссар
ХIасан Аьдиловлул
