Вай гьантрай Ккуллал райондалул администрациялул къатраву хьунни хьхьичIунсса хIасиллай школа къуртал бувсса выпускниктуран медальлу тапшур дулаллисса мажлис.

Шикку гьуртту хьунни Ккуллал райондалул администрациялул бакIчи Ажуб ХIусманов, ванал хъиривчу Анатолий Давдиев, райондалул КIулшиву дулаврил управлениялул хъунама Жамалуттин Оьмариев, кIулшивуртту дулаврил идарарттал каялувчитал, выпускниктал ва миннал нину-ппу.
Гьашину арцул медальлай школа къуртал бунни Хъусращиял школалул выпускница Марьям Давдиевал ва ЧIяйннал школалул выпускник Аскандар Гамаккуевлул.

Ажуб ХIусмановлул барча бунни ларайсса хIасиллай школа къуртал бувсса выпускниктал, барчаллагь увкунни вайннан кIулшивуртту дуллай захIмат бихьлай бивкIсса педагогтурахь.
– Ххирасса оьрчIрув! Зу лайкьну къуртал бунни оьрмулул цалчинcса шачIану. Мунин барашиннану хьунни хIакьину зун тапшур дурсса медальлу ва хьхьичIунсса хIасиллащалсса аттестатру. Вай медальлаву дуссар зул учительтуралгу, нитти-бутталгу, зувагу шиннардил мутталий буллай бивкIсса захIматрал хIасиллу. Умуд бур гихунмайсса оьрмулувугу зуяту райондалул цIа-кьини бюхттул дансса, пахрулунсса пишакартал хьунссар тIисса, – увкунни Ажуб ХIусмановлул.

Гьашину Ккуллал райондалий дянивмур даражалул аьмсса кIулшивуртту ларсунни 11-мур класс къуртал бувсса 43 выпускникнал ва 9-мур класс къуртал бувсса 57 выпускникнал. Вайннава хьхьичIунсса хIасиллай школа къуртал бунни 15 выпускникнал. Выпускниктурахь ххуллухъин тIутIисса ихтилат бунни Жамалуттин Оьмариевлул.

– Школалий дуклакисса шиннардий зу ккаккан бунни дуккавриву итххявхсса, яхI-къирият дусса, хъунанал хIурмат бусса, ххуйну тарбия бувсса оьрчIру бушиву. ДакIнийхтуну барчаллагь учин ччай ура марцIсса ххювардай дуклай бивкIсса выпускниктурахь ва вайннал учительтурахь, нитти-буттахь.

Школалия лавгун махъсса оьрмулуву зун хьунадакьлантIиссар захIматшивурттугу. На мукIруну ура захIматшивурттал хьхьичI никгу къарирщуну, райндалулгу, республикалулгу цIа лайкьну дуруччинсса, зува бусса кIанттурдай бусравсса инсантал хьунссар тIий, – увкунни Жамалуттин Оьмариевлул.

Ахирданий медальлу лайкь дурсса Марьямлул буттал Анатолий Давдиевлул ва Аскандардул ниттил Альбина Гаммакуевал барчаллагь увкунни цала оьрчIахь дарсру дирхьусса учительтурахь ва ми лахъа-хъун бувсса райондалул каялувчитурахь.