Москавлив 2026 шинал лачIун буккаврил Аьрасатнал чемпионат хьунни июльданул 30-нния августрал 1-ннийнин Лайв Ареналий. Призирдал фондрал аьмсса дуцин дия 15 млн къуруш. Гьарица чурххал кIушиврий ххув хьусса лачIунуккул ларсунни 500 азарда къуруш. Гьурттучитурал дурххуссар 10 комплект медальлал.

2026 шинал июльданул ахирданий кIул хьуну бур МахIач Муртазялиевлул каялувшиврийну турнирданий гьуртту хьунтIишиву Дагъусттаннал сайки 100 лачIунукку.
Ва чемпионатрай ххув хьунни жула лакрал цIа дурксса лачIунукку Ибрагьим Ибрагьимов. Утти Ибрагьим Ибрагьимов хъанахъиссар шамийла Аьра­сатнал чемпион, Заур Угуев – урчIийла Аьрасатнал чемпион, Аьбдулла Кьурбанов – мукьийла Аьрасатнал Чемпион, АьппасхIажи МахIаммадов– ­ххю­йла Аьрасатнал чемпион.
Ибрагьим ххув хьусса чIумал ванал лагма лавгунни журналистътал, миннал суаллахьхьун жавабру дуллай, жула лачIунуккул укун бувсунни:
«На хъинну хIадур хьуну усс­и­яв, дакI дарцIунугу уссияв ххув хьуншиврий. АлхIамдулиллагь, ттуща бювхъунни хIакьину ттула дакIниймур бартбигьин. Финалданий ттул личIисса тактика дакъассия. Мурад бия цинярда ряхрагу минутрай лачIун уккан ттула зумуну, бювхъусса чаралий. Счет 6:6 хьусса лахIзалуву на чаш къаувкссияв. Га чIумал личIисса асарду бикIай. Пикри бикIай так муттаэнаяту, ххув шаврия, шикку ва цIана, цIана ва шикку. Лахьхьу хьумуния, гьунттий хьунтIимуниясса пикри къабикIай лачIун уклакисса чIумал. Ххув хьунсса гъира, гьавас хъун шай ттула дус-къардаштал чIарав бусса чIумал. На бяст-ччаллайн увкIсса чIумал жул хъунама тренер МахIач Муртазялиевлул учай: «Вил уссурвал бувкIунни», – куну. Нагу учара: «Туну, на паракьат хьуссара, ххув хьунтIишиврий дакI дарцIуну уссара», – куну.
На Ислам МахIачевлущал сбор бувссия, шанна нюжмардий, навагу хъинсса формалий уссияв. Утти ттун ччай бур ва зурул 15-нний хьунтIисса Исламлул ияврийн гьан. Сбордай усса чIумал ганал ттухь хъярчлий увкуна: « Ух хьурча, маучIара», – куну. Утти лажин кIялану гьанна».

Чемпионатрал хIасиллу

57 кило
1. Абубакар МутIалиев (Дагъусттан).
2. Муса Мехтиханов (Дагъусттан).
3.Тунжай Вердиев (Оренбургуллал область) ва Амир Чамзын (Тыва).

61 кило
1. Заур Угуев (Дагъусттан).
2. Рамиз ХIамзатов (Ставрополлал край).
3.Кежик Монгуш (Иркутскаллал область) ва Чермен Тавитов (Москав).

65 кило
1. АьппасхIажи МахIаммадов (Дагъусттан).
2.Эльдар АхIмадуинов (Дагъусттан).
3. Башир МахIаммадов (Дагъусттан) ва Алик Хадарцев (Москавуллал область).

70 кило
1.Ибрагьим Ибрагьимов (Дагъусттан).
2. Азнаур Таваев (Дагъусттан).
3.Константин Капрынов (Якутия) ва МахIаммад-Эмин Эльтемиров (Чачаннал Республика).

74 кило
1.Иналбек Шериев (Москавуллал область).
2.Заурбек Сидаков (ХМАО).
3.Имам Ганишов (Дагъусттан) ва Умар Умаров (Дагъусттан).

79 кило
1.Исмяил ХIаниев (Дагъустан).
2. АхIмад Усманов (Да­гъусттан).
3. ХIажимурад Аьлихмаев (Брянскаллал область) ва Сяид Сайдулов (Дагъусттан).

86 кило
1. Ибрагьим Кьадиев (Да­гъусттан).
2. Артур Нейфонов (ХМАО).
3. Арсен Балаян. (Калининградуллал область) ва Руслан Черткоев (Ухссавнил Осетия).

92 кило
1.Аманулла ХIажи­махIа­ммадов (Дагъусттан).
2. Азамат Хадзарагов (Запорожскаллал область).
3. Владислав Валиев (Ухссавнил Осетия) ва Амир Булатов (Чачаннал Республика).

97 кило
МахIаммад Кьурбанов (Да­гъусттан).
2. МухIамад-ТIагьир ХIаниев (Дагъусттан).
3.МахIаммадхIажи Ма­хIаммадов (Дагъусттан) ва Аьлихан Жабраилов (Дагъусттан).

125 кило
1. Аьбдулла Кьурбанов (Да­гъусттан).
2. Алан Хугаев (Ухссавнил Осетия).
3. Павел Кривцов (Кемеровуллал область) ва Георгий Бязров (Ухссавнил Осетия).
ХI. Аьдилов