Вай гьантрай республикалий хьунни «Тинькофф Dagestan Wild Trail- данул» хIадур дурсса зунттавух ва зунттайх лечаврил марафон. КIицI лаган, вайннал Аьрасатнал региондалий шинал лажиндарай дуллай бур 6-7 марафон – программа хIасул хьуну дур 10, 20, 30, 50, 70,100 километрардал манзиллая.

Гъуниннал шярава дайдихьлахьисса дистанциярттай гьуртту хьуну бур 4000-нийн бивсса, Аьрасатнал регионная бувкIсса, трейлраннинграхун (зунттавух, вацIравух, авлахъирттайх лечлачисса спорт) багьсса спортсментал. Ва спортрал бяст-ччаллу ккаккан баву бакъассагу, Дагъусттаннал билаятрал караматсса тIабиаьтращал, хъамал ххирасса инсантуращал кIул буллалисса хъуннасса агьамшиву дусса ишну хъанахъиссар.

Зувира километралул манзилданийх 1700 метра бакIлавайсса ва 2350 метра бакIъялавайсса ххуллийхсса марафондалий левчуну ур Дагъусттаннал альпинист, ДР-лул лайкь хьусса строитель Зиябуттин ХIажимирзаев. Ва манзилданийсса лечаврий гьуртту хьуну ур трейлраннинграхун агьсса 600 профессионал. Къарадах шярава байбивхьуну, зунттайх, хъачI-бакIайх, къума ратIавухсса ххуллурдайх левчуну, Гъунивсса «Орлиное гнездо» тIисса турбазалучIа хьуну дур марафондалул ахир.
«Зунттайх бакIлавай лахълай, ялавай бучIлай, тик диркIсса лахъазаннайх лахълахъисса, хъинну захIматсса ххуллу бия. Гьарица дистанциялий ккаккан дурсса чIумуй финишрайн биян аьркинну бия. Ттущал 30 километралул манзилданийх лечлай уссия ттула дус, цIанихсса альпинист Денис, 75, 100 километралул манзилданийх левчунни альпинисткахъул Оля Румянцева ва Галя Одышкина.

Вай хъинну спортрахун багьсса, гужсса душру буссар. Вайннащал бяст бан къашай», – тIий, хъярч буллай ур Зиябуттин ХIажимирзаев.
Ва цалчин акъар укунсса марафондалий гьуртту хъанахъисса. Ларгсса шинал 35 километралул манзилданийх левчуну, ккаккан дурсса чIумуй финишрайн ивну, ванал медаль хIалал дурссия.
Гьашинусса марафондалул лагрулий гьурттучитурал кумаг бунни тIабиаьт гьалак дурккун зараллу хьусса инсантурангу.

Имара Саидова