Кулпатрал ва ччаврил кьинилун хасну

Июльданул 8-нний кIицI лагайсса Кулпатрал ва ччаврил кьинилун хасну Республикалул Халкьуннал творчествалул къатлул дунни флешмоб.
Ваний гьуртту хьунни республикалул муниципалитетирттайсса культуралул идарартту. Шикку хьунни ва кьинилун хас дурсса личIи-личIисса шадлугъру.

Дагъусттаннал культура Туркнаву

Турциянал хъуншагьру Анкаралий июльданул 3-5-нний хьусса Дунияллул халкьуннал дянивсса Ккавкказуллал искусствалул фестивальданий хьхьичIунсса гьурттушинна дунни Дагъусттаннаясса делегациялулгу.
Фестивальданул лагрулий хьунни личIи-личIисса шадлугъру, вайннувух – имам Шамиллул бюст тIитIаву, халкьуннал канил пишардал выставка ва гала-концерт. Вайннуй жула халкьуннал канил пишардал усттартурал ва творчествалул коллективирттал лайкьну ккаккан дунни чIяву миллатру бусса региондалул культура ва багьу-бизу.
Оьрмулул ца яла хъунама художник

Дагъусттаннал цIанихсса художниктуравасса ца, Аьрасатнал Федерациялул лайкь хьусса художник, ДАССР-данул искусствардал лайкь хьусса ишккакку Зулкьарнай Рабадановлун 90 шин хьунни.
Ва таварихрайн бувну республикалул художниктураву ­оьрмулул ца яла хъунама художникнан региондалул культуралул министрнал буржру биттур буллалисса Зарема Буттаевал цIаниясса Барчаллагьрал чагъар буллунни ванил цалчинма хъиривчув Мухтар Кьурбановлул. Аьрасатнал Художниктурал союзрал Дагъусттанналмур отделениялул председатель Кьурбанаьли МахIаммадовлул ва Аьрасатнал Федерациялул халкьуннал художник Гейбат Гейбатовлул юбилярнан дуллунни Аьрасатнал Художниктурал союзрал чулухасса медаль.
«Буца нину-ппу музейравун ва театрданувун»

Жулла республикалий ­аьдатравун дагьсса «Веди родителей в музей, театр, концертный зал» цIанилусса акция зун диркIунни.
Ванил лагрулий жагьилтураща бюхъантIиссар цачIарасса Пушкиннул карталийн бувну нину-ппу культуралул мероприятиярттайн буцлан. Цала ниттинсса ва буттансса кIива билет вайннаща ласун бюхълай бур укунманийнияр 10-50 процентрал ялавайну.
Ва акциялул шартIру ишла дурну цалла кIулшивуртту авадан дуван, кулпатравусса арарду цIакь дуван оьрчIру ва нину-ппу уква гьансса шадлугърурив чан дакъар жулла республикалул культуралул идарарттай.
Акция зузиссар августрал 15-нин.
Музейран – цIусса кьай-кьуй

Дагъусттан Республикалул Аь. Тахо-Годил цIанийсса Национал музейрал техникалул база цукссагу авадан хьунни.
Ва музейравун ва ванил филиаллавун, «Кулпат» тIисса цIанилусса национал проектрал лагрулий, дуркIунни цIусса кьай-кьуй.
ЦIусса оборудование музейрал директор Пахруттин МахIаммадовлущал ххал дунни республикалул культуралул министрнал буржру биттур буллалисса Зарема Буттаевал.

Бадрижамал Аьлиева