Кулпатрал, ччаврил ва дакI тIайлашиврул кьини Ккуллал райондалул Культуралул къатлул зузалт бивунни, 50-нния лирчусса шиннардий нахIу-хIалимну, бавкьуну цачIу оьрму бутлатисса Муртазааьли ва Саэд Мутаевхъал кулпатрачIан.– Вай гьантрай ттул оьрмулун 80-шин бартларгунни. Рязину ура хъунасса Заннал ттунма нясив бувсса кьадардания. ХIакьину ттул лагма лавгун бур ххаллилсса оьрчIру, оьрчIал оьрчIру. Барчаллагьрай ура гьарица ишираву мудан ттула чIарав бацIлай бивкIсса кулпатрайн. ДакI тIайласса оьрмулул дус Саида ттунма нясив къабувссания, нава ваксса хIаллай ялапар хъанай къаикIанссияв тIун икIара, – тIий ур Муртаазаьли.

Муртазааьлил ва Саидал ххаллилсса тарбиягу дуллуну, чивун буккан бувну бур шанма душ ва ца арс. ЦIана вай кумаг буллай бур оьрчIал оьрчIру хъуни бан.
– Муртазааьли ва Саида хIал бавкьусса, кумаг аьркиннал чIарав бацIан хIадурсса, жяматрал дянив хIурматрайсса инсантал бур. Вайннал наслугу цахава лавхьхьусса бур. Ххуйсса нитти-бутталли ххуйсса оьрчIругу тарбия байсса. На вайннал кулпатран чIа тIий ура цIакьсса цIуллушиву ва талихI-тирхханну, – увкунни Щамхал Хизриевлул.

Махъа нанисса жагьилсса кулпатирттан нахIу-хIалимну архIал оьрму бутлай, цаннан ца бувчIлай, кулпат буруччинсса хIарачат буллалияра тIий, маслихIат ккаклай ур Муртазааьли. Культуралул къатлул зузалтрал Мутаевхъал кулпатран хас бувну увкунни асар хьунсса ­балайрду ва дунни ­вайннан дакIний личIансса бахшиш. Ахирданий цинявппа къавтIавуртту дуллай, тяхъа буклай, суратру ришлай бия.

Имара Саидова