Аьрасатнал ишбажаранчишиврул (предпринимательствалул) кьинилун хасну, Дагъусттаннал бакIчинал буржру чIумуйну биттур буллалисса Федор Щукин хьунаавкьунни республикалул чIиримур ва дянивмур бизнесрал вакилтуращал.

Хьунабакьаву дайдирхьунни ванал ишбажаранчитурахь СВО-рал гьурттучитуран ва вайннал кулпатирттан, мукунма тIабиаьтрайну зараллу бивминнан буллалисса кумаграхлу барчаллагь учаврийну.

Хьунабакьаврил лагрулий ххал бивгьунни ишбажаранчитурал хьхьичI бавцIусса, вайннан багьайсса куццуйсса шартIру даврицIун бавхIуну, республикалул каялувшиндаран щаллу буван дакIнийсса масъалартту. Вайннувух гьаз бунни бизнесрал легализациялийн ва бизнес тIитIлатIисса чIумалсса административ процедурарду бигьа даврийн багьаймигу. Гьаз бунни республикалий зайтундалул (оливковый) багъ баврилмур масъалагу.

Федор Щукиннул кIицI лавгунни властьрал мурад бушиву бизнес «ххютула» дуккан даву ва мунил тIайласса даврицIунсса шартIру щаллу даву, ва кьинисса хьунабакьавугу дуршиву ишбажаранчитурал чулухасса суаллу баян, «цIуцIи кIанттурду» ялун личин буван.

Дагъусттан Республикалул ХIукуматрал председательнал буржру биттур буллалисса МахIаммад Рамазановлулгу цалва ихтилатраву кIицI лавгунни марцIну ва тIайлану зузисса ишбажаранчитурал чIарав бацIан, бизнес тIитIин, хьхьичIуннай дуван шаймур буллантIишиву.