Декабрь зурул 12-нний Ккуллал райондалул культуралул къатрал залдануву хьунни кIира байрандалун хас бувсса мажлис: ца – Аьрасатнал Конституциялул кьинилун хас бувсса, цагу – ялун нанисса шин Театрданул шин душиву кIицI лаглагисса.
Конституция кьамул баврия, мунил Аьрасатнал гражданиннал оьрмулуву цукунсса кIану бугьлагьиссарив бувсуна трибуналуха Ккуллал райондалул администрациялул вивсса политикалул отделданул каялувчи Шамххал Хизриевлул.
Докладрал хъирив, культуралул зузалтрал даву дайдишиннин хьхьичI, Хизриевлул барча увна «Илчи» кказитрал Ккуллал райондалийсса корреспондент ХIусайнов ХIажимурад, мунал оьрмулул юбилейрацIун бавхIуну. Ванал кIицI лавгуна ХIажимурад дакIнихтуну Лакку билаятгу ххирасса, райондалий шаймуния, царагу мероприятие лях гьан къадиртун, «Илчи» кказитрай бусайшиву.
[dropcap]Ч[/dropcap]Iа увкуна вания тихунайгу укуна итххявххун зунсса цIуллушиву. Культуралул зузалтрал чулуха ХIажимурадлун дуллуна грамота ва багьлул ххирасса сурат. Вай бахшишру дулавривух гьуртту хъанай бия Ккуллал райондалул бакIчинал хъиривчу Давдиев Анатолий ва райондалул культуралул хъунмур Ибрагьимова Марина.
ЯлунчIинсса 2019-ку шин Театрданул шин душивруцIун бавхIуну, сахIналул ца чулийн лархъун дия му иширан хас дурсса хъуннасса баннер. Хъирив культуралул зузалтрал ккаккан дурсса хъинну ххуйсса концертравухгу бия Театрданул шинан хас бувсса Хъусращиял халкьуннал театрданул ва Хъювхъиял культуралул къатлул театрал номерду. Культуралул программа дачин дурну ия Хъусращиял халкьуннал театрданул режиссер Марсел Сулайманов.
Аьрасатнал паспортран хас дурсса назму дурккуна «Илчи» кказитрал хьхьичIунсса дус, макьалартту чичу, ЧIяйннал шяравасса Аьбдуллаев Арсеннул. Хъинну ххуйсса балайрду увкуна Залина Гудовал, Гриша Ванатиевлул, Альбина Тахтаровал, Саманият Аьлиевал, РайхIанат ХIажиевал, Зулпия Даллаевал, Шавлухъ СалихIовал, Гулжагьра Рамазановал, Муслим Суллуевлул, Асият МахIаммадовал, Санжана АхIмадовал ва цайминналгу. Гьарцагу тяхъашиврул ца яла авурмурну шайсса Вихьуллал къавтIаву ккаккан дурна Вихьуллал культуралул къатлул зузалтрал.
Тяхъашивурттал ахирданий байрандалий гьуртту хъанахъисса цинявннал щаллу дурна Лакку гимн.
