Шанна нюжмардий, дукан-хIачIан дакъана, цана цувалу Запорожcкаллал чулийнмайсса душманнал опорный пункт бувгьуну ивкIсса Аьрасатнал аьраличу, штурмовой роталул разведчик-сапер, къучагъсса дагъусттанчу Закаръя Аьлиевлул цIа (позывной «Смайлик») бусалдаравун дагьунни. Ца лахIзалий ва машгьур хьунни щалагу Аьрасатнал билаятрай

Аьраличунал цала бусласимунийн бувну, душман гъанну ушиврийн (20-40 метралул манзил) ва битавуртту пахъ къадагьлай душиврийн бувну, ванаща я нигьачIаву дакъанийн уккан, я ттуршрахъул метралул архсса жуламиннаясса кумаг кьамул бан бюхълай къабивкIун бур.
Ккашигума ВСУ-лул аьралитурая ливчIсса чимус канай бащан бан бюхълай бивкIун бухьурча, мякь лиххан бансса цичIар къадиркIун дур.
– Ва позициялучIан гъан хьун хъинну захIматну бия. Щала кIанттурдайх дирхьуну дия минарду, лехлай дия дронну. Жун пикри хьуна хьхьувай мотоциклетирттай буххан. Опорный пунктгу канийн лавсун, ххюя душмангу ясир угьарду. Хьумур кIул шайхту, ВСУ-лул жуйн буцирив ярагъуннива цIу тIиртIуна. КIюрххицIуннай дроннугу дуркIуна.
КIилчинмур кьини, душманнал цIаравух ттул аьралий дустал махъунмай бавчуна, нарив позициялий ацIан пикри бав. Душманнан навалу ушиву кIул къахьун, янна даххана дуллай, личIи-личIисса чуллаха битлай, «Сдавайтесь», тIий, оьвтIий уссияв, – буслай ур саллатI.
Душманнан опорный пунктрай инсан ушиву ч1алай, аьраличунайн тIайла дурну дур думур техника. «Баба Яга» дрондалул ва кIучI хьусса нуххувун мина рутан цимилгу кьаст лархIуну дур. Дронну паракьат хьусса чIумал, ялун увккун, лагма-ялттусса кIанттурдайх дуканмуних луглан икIайсса ивкIун ур. Закаръя кьабивтсса позициярдай чимусул дарваг лявкъуну, ми канай ивкIун ур.
Командование ва сагъну акъассар тIий бивкIун бур.
Шанна нюжмар лагайхту, Закаръянан бувчIуну бур укун цала иш ххуйну къабагьаншиву, ци-бунугу чаран лякъин аьркиншиву. «На Смайлик ура. Сагъну ура» тIий чивчусса плакат дирхьуну дур ванал чIалансса кIанттурдай. Мунияр махъ ЗакаръяначIан щинал шушлущал дуркIун дур записка: «Ина уккан ан къахьунссара, гъан хьун бюхълай бакъар, инава хIарачат бува. Дрондалул ххуллу ккаккан бантIиссар», – тIисса.
Пахъдагьру хьусса чIумал, Закаръянан цащава шайкун лихъан пикри хьуну бур. Ва гужсса лечу ивкIун ур. Амма каши-мякьлил азурда увсса аьраличунай анаварну лихъансса алхъи къадиркIун дур.
Караматсса иш. Заннал кабавкьуну, щищакIуй буккан къавхьусса, минардал бувщусса авлахърайх Закаръя жуламинначIан увкIун ур. Вай махIаттал хьуну бур разведчик тукунсса кIанттурдая сагъну уккаврий.
Закаръя Аьлиевлун 28 шин дур. Ва увну, хъуна хьуну ур Къизлярдал райондалийсса Косякино тIисса шяраву. Шиккува къуртал бувну бур школа.
Школалул директор АхIмад Аьлиевлул бусласимунийн буну, Аьлиевхъал кулпатраву шанма оьрчI бур. Нину къашавай дуну, Закаръянан мудан ичIаллил хъар лахъан багьайсса бивкIун бур.
– Гьарнаща къашайссар ванал бувхIумур бухIан, ванал дурмур дан. Ва чурххал илтIа-кIюласса ухьурчагу, икIайкунсса кьянкьушри, – тIий ур школалул директор.
Дагъустаннаясса СВО-лул ветерантал тавакъю буллай бур Закаръя Аьлиевлун Аьрасатнал Виричунал цIа дулун.
Вай гьантрай Къизлярдал райондалул каялувчитал хьунабавкьунни къучагънал ниттищал Халисатлущал.
Ванил бувсунни арснал хъунмасса хIаллай циява кьюлтI буллай ивкIшиву цува чув уссарив. Закаръя цила увагу усса ца арс ушиву, ва цилагу, кIивагу ссийлгу кумагчи ушиву.
Къучагънал ниттил барчаллагь баян бунни ва лявкъуну, уккан кумаг бувсса «Алания» батальондалул аьралитурайн.
ЦIана Закаръя госпитальданий ур. ВаначIан бивунни Запорожскаллал областьрал сенатор Дмитрий Рогозин, полкравасса аьралитал.

Лажин хIадур дурссар
Андриана Аьбдуллаевал