Бадави Рамазановлул цIанийсса ЧIяй­ннал школалий лахъа-хъунну хьунаавкьунни хасъсса аьралий операциялул гьурттучи Буниямин Аьйдаев.

Ва хьунаакьлакьисса мажлис хьунни щарнил зума-къирагърайсса Хъунмасса Буттал КIанттул цIанийсса дяъвилул вирттавран, хаснува Совет Союзрал Виричу ЦIаххай Маккаевлул, Граждан дяъвилул къучагътуран, Венгриянаву ва Авгъаннавусса дяъвилул иширттал ва хасъсса аьралий операциялул гьурттучитурал цIарду абад дуллалисса мемориалданучIа.
Буниямин хьунаакьин бувккун бия райондалул личIи-личIисса идарарттал каялувчитал ва зузалт, дуклаки оьрчIру, райондалул администрациялул вакилтал, щалагу щарнил жямат. Мероприятие дайдирхьунни вирттаврал аьпалун баян бувсса минутIрайсса пахъ багьаврийну.
Мажлис тIитIлай, ихтилат бунни ЧIяйннал шяраваллил бакIчи АхIмад Билаловлул. Ванал кIицI лавгунни укунсса хьунабакьавурттал жунма лавгмургу дакIнин бутлатишиву, буттахъал чувшивурттугу абад дуллалишиву.
Хъирив ихтилат бунни Ккуллал райондалул администрациялул хъунаманал хъиривчу Анатолий Давдиевлул.
Ванал кIицI лавгунни, жула буржну хъанахъишиву Ватандалул мурадру буручлачиминнал чIарав бацIаву ва жула тарих ябаву. Вирттавращалсса хьунабакьаврил тIурчIа, тарбия дуллалиссар жула оьрчIаву Ватандалухсса ччаву.
Школалул ОБЗР-данул педагог-организатор Аслан Рамазановлул дакIнин бувтунни, вай хьунабакьавуртту дуклаки оьрчIансса чувшиврул дарсну хъанахъишиву.
Ва хьунабакьавугу мукунсса чувшиврул дарсиран ккаллиссар. Мажлисрал гьурттучитуран хъинну асар хьунни Бунияминнул гъанчув Сиясат АьбдурахIмановал бувсса ихтилат. Ванил бувсунни Бунияминнул оьрчIшиврия, кьянкьасса хасиятрая, цаманан кумаг бан хIадуршиврия.
– Ва бигьасса ххуллу язи бугьайминнавасса акъая. Иш багьувкун кьянкьану авцIунни Ватандалул мурадру буруччаврил цIаний. Жунма ванаяту пахру бикIан аьркинссар, – увкунни ванил.
ЧIяйннал школалул директор Альбина Гаммакуевал цила ихтилатраву кIицI лавгунни, укунсса выпускниктурая пахру бушиву, вай махъсса никирангу эбратну хьун аьркиншиву.
Цинявннал ихтилатру бувну махъ, миннахь барчаллагьгу увкуну, Бунияминнул бувсунни аьралий дустурая, дяъвилул шартIирдая, цаннал чIарав ца бацIаврия, шаппатусса хавардах мякьну бикIайшиврия. Хаснува ванал кIицI лавгунни цуксса ххари шайссарив аьралитал дуклаки оьрчIаясса чагъардая ва открыткардая.
– ОьрчIал карунних чивчусса ххару ккалаккисса чIумал бувчIлай бур жува ссахлуну талатиссарив, – увкунни Бунияминнул.