Вай гьантрай Аьрасатнал Виричу Халид Мурачуевлул цIанийсса Ккуллал 1-мур школалий тIиртIунни Ватандалул мурадру буруччаврил ххуллий чувшиврий жан дуллусса Ккужаннул арс Кьубаев Каримлул цIа абад дуллалисса мармарчарил ула.

Ва цIакь дурунни Карим дуклай ивкIсса школалул чIирай. Мероприятиялий гьуртту хьунни Ккуллал райондалул бакIчи Ажуб ХIусманов, ванал хъиривчу Юсуп Исякьов, Лакрал ва Ккуллал районнал аьралий комиссар Аьли ГъазимахIаммадов, Ккуллал 1-мур школалул директор МахIаммад Чаринов, Лакрал ва Ккуллал районнал призыврал отделданул хъунама Ажуб Юсупов, СВО-лул Ветерантурал ассоциациялул председатель, Ккуллал райондалийсса «Память гор» тIисса жяматийсса идаралул вакил Нураттин Рамазанов, аьралий иширттал ветеран Шамхал Хизриев, Каримлул ппу Ккужан ТIагьирович ва нину Маржанат Бадавиевна, школалул дуклаки оьрчIру ва шяраваллил жямат.
Аьпалул мажлис байбишин хьхьичI Ажуб ХIусмановлул Каримлул нитти-буттахьхьун дуллунни виричунал канил дугьан нясив къархьусса Къучагъшиврул орден.
Мармарчарил улттуя пардав ликкансса ихтияр дуллунни Ажуб ХIусмановлухьхьун ва виричунал ппу Ккужаннухьхьун. Мероприятиялий гьуртту хьун бувкIминнал, аьпалул улттуцI тIутIивгу дирхьуну, дурна минутIрайсса пахъ багьаву.
Аьжуб ХIусмановлул Каримлул нитти-буттахь барчаллагь увкуна лайкьсса арс тарбия аврихлу.
– ХIакьину жува абад дуллай буру Ватандалул ххуллий жан дуллусса къучагънал цIа. Вирттал сагъну буссар, ми жунма дакIний буссаксса. Ватандалул ялун нигьачIаву дирсса чIумал, ванал цала буржну ккавккунни аьралий мурадру буруччаврил ххуллий талан цала хушрай гьансса. Каримгу, ва кунма къучагъну жула паракьатшиврул цIаний жанну дуллусса цаймигу вирттал жунма хъамабитан къабучIиссар. Жан дуллусса арснацIа хьусса нитти-буттахь укунсса чIумал учинмур ляхълан къабикIай. ХIурмат бусса Ккужан ва Маржанат, зул арснал къюву – жулгу къювур. Жу хIарачат банну зул чIарав бацIан, аьркинсса иширттан кумаг бан. Кьянкьа дувара, жу мудан зущал буссару, – увкунни ванал.
Хъирив ихтилат бунни Щамхал Хизриевлул.
– Жагьилтал – жула бучIантIимурди. Миннал тарбиялухсса жула къулагъасгу дикIан багьлай бур хъуннасса, хаснура Ватан ххирану тарбия баврих. Жула дусса язимур хъу­с – Ватанни.
Каримлул жан дуллуссар, ­аьраличунал хъалийн хаин къавхьуну, хIакьсса ххуллий. Шикку дуклакисса оьрчIан тачIав хъамакъаитантIиссар жула билаятрал цIаний жан дуллусса къучагъ, – увкунни ванал.
Каримлул оьрмулул ххуллия бусласисса ихтилатру бувна МахIаммад Чариновлул, Нураттин Рамазановлул ва ванал учительтурал. Виричунан хас дурсса назмурду дурккуна Ккуллал 1 -мур школалул дуклаки оьрчIал.
– ПаччахIлугърал мурадру буруччаврил ххуллийсса хIукму кьамул бувну, хушрай хасъсса аьралий операциялийн лавгун, Ватандалул цIаний жан харж дунни жул арснал. Билаятрал ялун бучIантIимунил жаваблувшиву цайра душиву кIулсса оьрчI ия. Иш багьсса чIумалли адаминал къирият ккаккан дайсса. УрчIва барз бувссия жу Каримлул оьвчиннин ялугьлай. Ахиргу оьвкуна ванал гьалмахтурал… ЩинчIав нясив къаданнав жул кулпатрал ялун дирсса кьини. Хъунмасса барчаллагь тIий ура жул арснал аьпа буруччаврил ххуллийсса давривух гьуртту хьун бувкIминнахь, – увкунни Ккужаннул