Июньдалул 7-нний Москавлив Аьрасатнал президентнал Дагъусттаннал Постпредствалул Кубок ласунсса спортрал байран дунни.
Дагъусттаннал студентътурал ва жяматийсса ишккаккултрал, активистътурал командартту футболданий ва волейболданий дурккунни. Ва даврил сиптачитал ва сакиншинначиталгу кIицI лавгсса Постпредствалул вакилтал бия.
Турнир тIитIлатIисса шадлугърай гьуртту хьунни цува Постпред (врио) ХIажимурад Къажлаев ва ванал цалчинма хъиривчу Илдар Къашкъаев. Шиккува кIицI лаганна, къакIулнангу кIул хьун, уттинин Постпреднал хъиривчуну зий ивкIсса ХIажимурад Къажлаев чIумуйнусса Постпредну цIакь увшиву. Вагу, ванал хъиривчуну ивтсса Илдар Къашкъаевгу лак бушиву.
ХIажимурад Къажлаевлул бувсунни спортрал тIуркIурду гьарза-гьарта буван дакIний бушиву, Постпредствалул мудангу дагьайкунсса къулагъас душиву Москавлив ва лагма-ялттусса шагьрурдай дуклакисса Дагъусттаннал студентътурал оьрмулул иширттах.
Бувсунни жагьилтал цачIунмай баншиврул, жура-журасса мероприятияртту дувайшиву ва гихуннайгу ми давурттал майдан гьарза-гьарта бувантIишиву.
«Жул Дагъусттаннал студентътал дуклакисса чIявусса ВУЗ-ирдащал дахIаву дуссар, шадлугърал тагьарданий жучIанма бучIан бувну булайссар личIи-личIисса стипендиярттугу. ДакIру ххари хъанан дикIай итххявхсса студентътал бушиву чIалай, ректоратругу вайнная рязийну бушиву асар шай. Дуккавриву хIарачат буллалисса бушивруцIун, жяматийсса иширттавухгу чялишну хIала буххайссагу бикIай. Спортрахунгу машхулсса. Жул мурадгу – вайннацIун кабакьавур», – увкунни ванал.
Илдар Къашкъаевлулгу цала ихтилатраву кIицI лавгунни физкультуралухун, спортрахун жагьилтал машхул буллалисса даврия мюнпат бушивруцIун, дусшиврийсса арарду цIакь дувансса сант рутлатисса даву душиву. Хаснува гъурбатрай жула жагьилтал куннал кув бувгьуну ва чил хIурмат буну къуццу тIун аьркиншиву.
Турнирданул хъамаллуравух бия Халкьуннал Мажлисрал депутат ХIабибуллагь МахIаммадов, Европанал чемпион Руслан Мирзабеков ва цаймигу бусравсса хъамал.
200-нниха ливчусса жагьилтурал 12 футболданул ва 8 волейболданул командартту дурккуна спортрал майданнийн.
Спортсментуран ва хъамаллуран хIадур дурну дия хъуннасса культуралул программагу. Ккавкказуллал халкьуннал къавтIавуртту ккаккан дурна «ЛиКаНа» ансамбльданул, балайрду увкуна театрданул ва кинорал артист Ислам Исабагъандовлул ва цаймигу балайчитурал.
Бия Дагъусттаннал халкьуннал дукиярдал балгусса ссупрагу.
Соревнованияртту къуртал шайхту хьхьичIун ливчуминнан буллуна кубокру, медальлу ва дакIний личIансса бахшишру.
ПатIимат Рамазанова
