Апрельданул 14-нний Дагъусттаннал БакIчи Сергей Меликов хьунаавкьунни Аьрасатнал транспортрал министр Виталий Савельевлущал.
Миннал ххал бивгьунни цаппара ххуллул объектру баврил ва бакьин баврил масъалартту.
Хьунабакьаврий гьуртту хьуминнал ххал бивгьунни Дагъусттаннал ва Азирбижаннал дазуй Яраг-Казмаляр тIисса машинартту итабакьайсса кIану ттизаманнул тIалавшиннацIун бакьин баврил масъала. Му бакьин баврийну бюхълантIий бур гьантлун 600 хъус духхай машина ххишалану итабакьлан.
Мукунма ххал бивгьунни «МахIачкъала» аэропортрал реконструкциялул кIилчинмур ятIап дайдишаврил ва самолетру ликкайсса цIусса ххуллу баврил масъала. Ми бакъассагу, ххал бивгьунни «Ккавкказ» Р-217 федерал ххуллул Манасрая Яраг-Казмалярдайн бияннинсса кIану бакьин баврил масъала. Микку ххуллу гьарта бувансса ният дур.
Ихтилат хьунни мукунма МахIачкъалаллалгу, Дарбантуллалгу, Хасавюртуллалгу лагмасса ххуллурду баврил проектирдал ва МахIачкъалаллал хьхьирил машлул портрал лябуккулул масъаларттаягу.
Виталий Савельевлул бувсунни ххал бивгьусса циняв масъаларттащал кIул хьунтIишиву Аьрасатнал Транспортрал министерствалийгу.