ЦIуссалакрал райондалул бакIчи МахIаммад-ХIажи Айдиевлул хIукму бунни «ятIул зоналий» зузисса медиктуран гъилисса дукра дузал дуллансса резевр фонд сакин дансса.
Ва фондравун райондалул ва шяраваллил администрациялул зузалтрал, Культуралул, Шяраваллил хозяйствардал управлениярттал, «Заманалул чIу» кказитрал редакциялул, ЕДДС-рал ва цаймигу идарарттал зузалтрал цивппа рязину ца кьинисса даврил харжи бичинтIиссар.
Январь зурул 25-нния байбивхьуну, Н.М. Мирзоевлул цIанийсса ЦIуссалакрал райондалул азарханалул «ятIул зоналий» зузисса 13 медикнан гьарица кьини диян дуллантIиссар гъилисса дукра. Шиккува кIицI лаган, ва акциялул сиптачину увккунни Дагъусттаннал БакIчи Сергей Меликов.
Ванияр хьхьичI ихIсандалул акциялувух хIала бувххунни #Мывместе региондалул клубращал архIал ДР-лул Жагьилтурал министерство.
«Ва акциялия коронавирусрал инфекциялущал талатисса медиктуран хъунмасса кумаг хъанахъиссар. ХIакьину хIакинтал зий бур хъинну захIматсса шартIирдай, мунияту вайннал даву хъис дунугу, куклу дан, вайннавун зунсса гъира-шавкь бутан, чIарав бацIан жулва буржри», – увкунни МахIаммад-ХIажи Айдиевлул.
Жула республикалий акция най бикIантIиссар февраль зурул 21-нийн бияннин.
