ЦIуссалакрал райондалий чялиш бувккун буллай бур коронавирусрая буруччаву мурадрайсса вакцинартту. Инсантуран бувчIлан бивкIунни коронавирусрацIун дархIуну хIасул хьусса нигьа­чIисса тагьарданува  вакцинартту баврийхчIин бакъа буккан къахьунтIишиву. 

ХIакьинусса кьини ЦIуми­налийсса ЦIуссалакрал щархъаву 9675 инсаннал бунни ковидрая мюхчан хьунсса  вакцина. Вакцина бунни райондалул администрациялул, кIулшивуртту дулаврил, культуралул ва цаймигу идарарттал зузалтрал, ишбажаранчитурал ва укунмасса агьалинал.
Прививкарттал кампаниярттал даву дайдирхьуния шинмай ЦIуссалакрал райондалул поликлиникарттайн бувкIунни 14590 доза вакциналул – «Гам-КОВИД-Вак» (Спутник V), «ЭпиВакКорона», «Спутник Лайт».
Райондалул цинявппагу агьалинал иммунитетгу цIакь шаву мурадрай,   вакцина бан багьлай бур къабувну ливчIсса  21882 инсаннал.
ЦIуссалакрал райондалий­сса кIивагу поликлиникалий тIивтIуну бур прививкартту дуллалисса  пунктру. Оьвчаву дуллай буру райондалул агьалинахь, ми пунктирдайн лавгун, ххалаххи бувну, зулла цIуллушиву дуруччара тIий.
ХIакьинусса кьини, так ца вакцина баврийну бакъа, жува ва азардануща буруччинсса чаран цамур чIалай  бакъар.
Бурувччуну бикIияра.