МахIачкъалалив Ссихьрал театрдануву хьунни «Защитникам Отечества посвящается» тIисса республикалул дуклаки оьрчIал дянивсса конкурсрай ххув хьуми ва хьхьичIунсса кIанттурду бувгьуми барча буллалисса шадлугърал мажлис.
ОьрчIру барча бан бувкIун бия Дагъусттаннал бакIчи Сергей Меликов, Дагъусттаннал ХIукуматрал председательнал хъиривчу Муслим Телякавов, Дагъусттаннал культуралул министр Зарема Буттаева, Дагъусттаннал жагьилтурал министр Камил Саидов, Дагъусттаннал кIулшиву дулаврил ва элмулул министр ЯхIия Бучаев, МахIачкъала шагьрулул мэр Юсуп Умавов, Дагъусттаннал Региондалул управлениялул центрданул каялувчи Исрапил Исрапилов, Дагъусттаннал Хъаннил союзрал председатель Интизар Мамутаева, Дагъусттаннал Чичултрал союзрал председатель Марина АхIмадова-Колюбакина.
ДакIнин бутан, «Защитникам Отечества посвящается» конкурс баян бувну буссия Дагъусттаннал бакIчи Сергей Меликовлул сипталий. Ва хас дурну дуссия Буттал кIанттул цIанийсса Хъунмасса дяъвилий Ххувшаву ларсун 80 шин шаврин. Конкурс дия шанна номинациялий. «Изобразительное искусство» – «Я рисую Победу» номинациялий ххал диргьунни халкьуннал къучагъшиву ккаккан дуллалисса оьрчIал дирхьусса суратру.
«Литературно-художественное творчество» – «Я горжусь, я расскажу» тIисса номинациялий оьрчIал пасихIну бувккунни Буттал КIанттул цIанийсса Хъунмасса дяъвилиясса цала ляхъан бувсса шеърирду.
«Вокальное искусство» – «Голос Победы» номинациялий бия аьралий балайрдал бяст-ччал.
Конкурсрай гьурттушинна дан 4 азарунния ливчусса аьрзарду бувкIун бур. ХIасиллайн бувну, ххув хьунни 45 дуклаки оьрчI, 13 оьрчIал бувгьунни хьхьичIунсса кIанттурду. Миннава шама ия тамашачитурал чIурдайну ххув хьусса. Ми бакъассагу, профессионал искусствалул ххуллийн кIункIу баву мурадрай язи увгьунни 100 инсан. Сакиншинначитуран пикри бур конкурсрай гьуртту хьусса оьрчIал шеърирду ва суратру рирщусса жуж итабакьин, миннал давуртту оьрчIансса кказит-журналлай рищун. Му бакъассагу, конкурсрай гьуртту хьусса оьрчIру-душру райондалул ва республикалул хъунисса мероприятиярттай гьурттушинна дан кIункIу бантIий бур.
Гьурттучитуран дуллунни республикалул бакIчинал чулухасса дакIний личIансса бахшишру.
Конкурсрай «Вокальное искусство» – «Голос Победы» номинациялий шамилчинсса кIану бувгьунни Ккурккуллал школалул 7-мур классрал дуклаки душ Аматуллагь Барххулаевал. Ванил увкунни Татьяна Ветровал мукъурттийсса «Отмените войну» тIисса балай. Ва хIадур бувну бия оьрус мазрал учительница Гульнара Магьдиевал. Аматуллагьлун дипломгу, бахшишгу дуллунни Зарема Буттаевал.
Сергей Меликовлул барчаллагь увкунни конкурсрал гьурттучитурахь, оьрчIру хIадур бувсса учительтурахь, нитти-буттахь.
– Зун наградартту цIанихсса тарих бусса Ссихьрал театрданул къатраву дулавриву цила мяъна дуссар. Буттал кIанттул цIанийсса Хъунмасса дяъвилул шиннардий (1941-1944шш.) шикку бивкIссар саллатI ва хIаписартал дяъвилийн тIайла буклай бивкIсса 2 эвакогоспиталь (3187-мур, 5061-мур). Ссихьрал театрданул къатри республикалул тарихрал гьайкалданун ккаллиссар, – увкунни Сергей Меликовлул, оьрчIру барча буллай.
Мажлис къуртал хьуну махъ Ссихьрал театрданул артистътурал ккаккан бунни спектакль.
Андриана Аьбдуллаева
