Лакрал жагьилтурал ккурандалул (Лакское молодёжное общество) сипталийну хьусса, дунияллул халкьуннал дянивсса статусрал лагрулийн гьаз хьусса, лакку мазрайсса назмурду дуккаврил конкурсраятусса макьала ттун дайдишин ччива ттулва преподаватель ва наставник Роза Эльдаровал увкумуния: «Миллат цашиврул яла хъунмур хIикмат – маз ца бушивур. Жунма маз ябан ччарча, хъунмур даву дикIан аьркинссар оьрчIащал дархIусса, мазрая бакъача, му мазрай гъалгъа тIутIи буллалисса».

Дунни лакку мазрайсса назмурдал конкурсрал хIасиллу. Ххув хьуминнал цIарду рирщунни. Балжину цахъис гихунмай бусанну. Цалссарив ттун кIицI лаган ччива укунсса кIанттурду. Гьашинумур хъанай дур шамилчинсса конкурс. Гьар шинах ххув хьуминнан дакIний личIансса бахшишругу, арцуйнусса премиярттугу дулай конкурсрал сиптачитурал. Гьашинугу, кIицI ларгсса ккурандалул каялувчи Давуд Атаевлул хIарачатрайну, премиялул фонд дузал бунни, шаннагу номинациялуву 1-ми кIанттурду бувгьуминнан дуллалиссар 10 000 къуруш, 2-ми кIанттурду бувгьуминнан – 7000, 3-ми – 3000 къуруш. Гьай-гьай, шиная шинайн тIиссакссагу, ва конкурсрал даражагу, сийгу лахъ хъанай дур. ОьрчIругу, жагьилталгу лакку мазрай гъалгъатIи буллалисса (бугьарами битанну, миннаву, нажагь бакъа, маз къакIулсса къабикIай) ва конкурсрал яла хъунмур ххуйшивугу, агьамшивугу мури. Роза Эдьдаровал тIийкун, цуксса хIайпнугу, лакку маз кIулми, ишла буллалими, мунил тIин-тIааьн бувчIлачIими чан хъанай бухьувкун, ва тагьар даххана дувансса ца ххуллу-чаранни. Ласурча, 16 шинавун бияннинсса категориялуву гьуртту хьунни 204 инсан. Ххуйрикьай! Мяйжанссар, жагьилтуралмур категориялуву чанну бия. Конкурсрай Инстаграмрай цуманан чIявусса лайкру бивхьуну бурив, ми ххув хьушиврун ккалли буваву ттунма хас къабизай. Ляхъин хъунмасса бума, шяравалу хъуннасса дума хьхьичIун уккан бюхъайну тIий. ЧIарахбацIулт, лайкбихьулт чанну буну тIий, марцIну лакку мазрай, пасихIну, бюхханну ккалаккима лях гьан бюхъавриятусса нигь дуну тIий. Мунияту ттун ххуй бивзунни, лайкирдайну ххув хьуми ккаккан буваврицIун, жюрилул гьарца номинациялий ца-ца усттарну бувккуманал цIа рищавугу. Ва цалчин. КIилчин, ялунчIил конкурс дулларча, тIайлану хьунссия шагьрурдайсса ва шяраваллавусса оьрчIан номинациярду личIи дуварча. Шяраваллавуминнан, ххуйну къакIулхьурчагу, маз кIулну бикIай. Шагьрурдайминнал хIарачат хIисавравун ласун бучIир. Лакрал гимн ккалаккисса заявка кьамул къадуварча тIайлану хьунссия. Гимн цинявннан кIулну дикIан аьркинссар. Масалдаран, Американаву яхъанахъисса душнил дурккунни гимн. Ххуйри. Цаймигу бия гимн ккалаккисса. Амма, гимн – гимнрал ххуллий цурда риртуну, назму дуккирча тIайлахьунссар. Конкурсрал тIалавшиннарду утти ххидуван бучIир: качество ххуйсса видеорду тIайла дуккияра учаву ва чара бакъа назмулул авторнал цIа кIицI лагаву. Конкурсраву ххув хьуми барча буллай, дакIнийхтуну барчаллагь тIий буру цинявгу гьуртту хьуцириннайн. Зул гъирагу, хъитгу лакку маз яшаврил ххуллийссар. Укунсса конкурсирттаву гьурттушинна дуваву – зунма лакку маз ххирану, хьхьичIунну бушиву ккаккан бувавур.

16 шинавун бияннинсса категориялуву 1-мур кIану бувгьунни Хъусращиял шяраватусса Сулайманова ПатIиматлул, 2-мур кIану – Гьамиящиял шяраватусса ХIажиева Амирал, 2-мур – ЧIурттащатусса МахIаммадова Сафиял.

16 шинава 35 шинавун бияннинсса категориялуву 1-мур кIану бувгьунни ДучIиятусса Рамазанова (Оьмарова) Асиятлул, 2- мур – ЦIуликъяниятусса ва Кьубатусса Кьурбанова Марияннул, шамилчинмур – Гьамиящиял шяравасса Хизриев МахIаммадлул.

35 шинава ливчуминнал категориялуву 1-мур кIану бувгьунни Къяниятусса Ма­хIаммадова Рукьижатлул, 2-мур – Ккулатусса ХIайдарова ПатIал, 3-мур – Чапаеволиятусса ЦIаххаева Ххадижатлул. Вай циняв лайкру хIисав бувну хьхьичIун бувк­мири.

Жюрилул хIукмулийн бувну, 16 шинавун бияннинсса категориялуву ххув хьунни ЦIийшатусса ХIасанова Зайнаб. 16 шинава 35 шинайн бияннинсса категориялуву – Гьамиящатусса Кьурбанов Руслан. 35 шинава ливчуминнал категориялуву — Муса-Мямма Гъапуров. Конкурсрай яла чIавама участник хIисаврай, Чапаево шяраватусса АхIмадова Аьшун завалун ххюазарда къуруш цилла чулуха дуллалиссар МахIаммад Мусалаевлул.

Ва ялагу, «Ислам в Лакии» тIисса лакку мазрайсса порталданул гьарца гьуртту хьуманан буллалиссар Барчаллагьрал чагъар ва 16 шинавун биянминнал категориялуву чIявусса лайкру лавсъсса 50 оьрчIан булунтIиссар лакку мазрайсса луттирду. «Ттун ххишала бакъа тIааьнну бия мюрщи оьрчIал лакку мазрайсса шеърирдах вичIи дишин, дакI ххари хъанай дия, лакку маз яхьунссар­хха тIисса умуд ххихъанай бия. Луттирдал набордугу жу шагьрулийн учIан къашайманачIан пучрайх тIайла букканну», – увкунни кIа порталданул администратор Арсланаьли Сулаймановлул. Бусан ливчIунни ххув хьуминнан бахшишру дуллали­сса мероприятие лахъа-хъунну дуван дакIний бивкIшиву конкурсрал сакиншинначитал. Амма Роспотребнадзорданул къадагъалийн бувну къадуван хьунни. Давуд Атаев барчаллагьрай ур конкурсрал хIасиллу тIайласса хьуншиврул биял­сса хIарачат був­сса минахуртурал жюрилийнгу. Жюрилуву бу­ссия Да­гъусттаннал халкьуннал артистал Аслан МахIаммадов (председатель), Саният Рамазанова, Дагъусттаннал культуралул лайкь хьусса зузала, Лакрал радиолул редакциялул хъунама редактор Тамара Закарьяева, Лакку мазрал учительтурал ассоциациялул модератор ПатIимат Аьлиева ва «Илчилул» вакил хIисаврай нагу. « Инсан ВатандалуцIун, мархрацIун цIакьну авхIуну ушиврул барашинна дуллалисса яла агьаммур лишан – ниттил мазри. Амма ниттил мазрай гъалгъа тIутIисса инсантал лапва чан хьуну бур шяраваллал кIанттурдайгума. ИчIувагума гъалгъа оьрус мазрай буллай бур. Шагьрурдайрив, нажагьсса бакъа, мюрщи оьрчIру бакъар ниттил мазрай гъалгъа тIисса. Мюрщи миллатирттал маз бухкъалаганшиврул шаймур буллан аьркинни ниттил мазрал учительтуралгу, нитти-буттахъалгу. Ва, яла- яларив, цума-цагу инсаннал цанма пикри бучIан аьркинни ни­ттил маз ябансса, муний гъалгъа тIунсса ва цала оьрчIан лахьхьин бан­сса. Ва лакку мазрай пасихIну назмурду дуккаврил конкурсгу агьалинавун лакку маз ябанну тIисса пикри бутаву мурадрай­сса, жулва мазрал ххуйшиврий цал уттигу мукIру буллалисса, хIайран буллалисса давур. Хъунмасса барчаллагь тIий ура конкурсраву гьуртту хьуминнахь, мюрщи­сса оьрчIру гьуртту хьун був­сса нитти-буттахъахь, гъирарай, шавкьирай назмурду дур­ккусса оьрчIахь цахьвагу, хIадур бувсса учительтурахьгу, ялун нанисса никиравун мазрахсса ччаву рутан усттарну назмурду дурккусса хъунмур никирал агьулданухьгу. Буттахъая, буттал буттахъая жуйнма бивсса маз, ягу бувну, хъиривсса никирайнгу биян буваврил ххуллийсса давуртту уттигу дуллантIиссару, дукъаллайгу чара бакъассар», – тIий ур Давуд Атаев. ХьхьичIми шиннардийсса конкурсрай гьур­тту хьусса оьрчIал назмурдах вичIи дишайхту хасну ттулмур дакIнивун лакрал оьрчIан ла­кку мазрайсса, учиннуча, лакрал шаэртурал, шеърирду л­ахьхьин бувавриха я учительтал, я нину-ппу, гьаннайсса, цучIав зий акъа­сса кунмасса асаргу, буруккингу бувххуна. Лакрал оьрчIансса авадансса фольклордания ва ххаллилсса поэзиялия хаварвагу бакъануккар тIисса. Гьашинурив ва диялдакъашивугу диялну чан хьуну дия. Халкьуннал лахъи балайрдугума ккалай бия оьрчIру. Лакрал шаэртурал язисса назмурдугу дия. ЦIа дуванмургу, ххари буллалимургу ххишалану дия.

Спонсортуралгу цала чулухасса премияртту дулун цIарду рирщунни цанма ххуй бивзсса, усттарну назмурду дурккусса инсантурал. «Байрам-тур» тIисса турфирмалул хъунмур Тамара Закарьяевал Хъювхъиял шяраватусса 7 шинавусса ЦIаххаева София, ванин ччи­сса маршрутрай, уква экскурсиялийн буцин увкунни. Вара «Байрамтурданул» чулухасса премия дулунтIиссар Гъумучатусса 5 шинавусса Ибрагьимова Наргизлунгу.
Мариян Илиясовал цIаний­сса «Дараччи» фондрал цIани­ятусса премия дуллалиссар Чапаево шяраватусса 80 шинавусса Исмяилова Шириннун. ЧIурттащиял шяраваллил чулухасса хасъсса премия дуллалиссар ЦIуссачIурттащиял шяравасса 87 шинавусса Адамова ХIуруннун.
– Къулагъас къадурну битан къахьунссар Адамова ХIурун.Цинявгу бугьарами къулагъасран ва хIурматран лайкьссар. ДакIнийхтуну барчаллагьрай бура карчI къадурну гьуртту хьуминнайн, жагьилминнангу гъира бутаншиврул, – увкунни фондрал хъунмур Гульшан Хасаевал.