Ккуллал райондалий хьунни Ххувшаву ларсун 72 шин хъанахъаврин хас дурсса чIярусса давурттив.
ХIакьину райондалий яхъанай бур Хъун дяъвилул гьурттучитурал 23 щахъами. ВайнначIан шаппа-шаппайн лавгунни Ккуллал райондалул администрациялул къуллугъчитал ва райондалул Ветерантурал советрал председатель Загьидиев Аьбдул. Миннал, вай барчагу бувну, конвертру буллунни.
Майрал 8-нний Ххувшаврил кьинилун хас дурсса тяхъашивуртту хьунни райондалийсса 14-гу шяраву. Ва кьини Хъун дяъвилул гьурттучитуран дирхьусса гьайкаллацI тIутIив дирхьунни, «БивкIу бакъасса полкрал» суратирттащалсса маршру хьунни, шяраваллал культуралул зузалтрал, дуклаки оьрчIал хIадур бувсса номерду ккаккан бунни.
Май зурул 9-нний тяхъашивуртту дайдирхьуна, райондалул жямат, хъамал бавтIун, ЧIяйннал шяравасса Хъун дяъвилул Виричу ЦIаххуй Маккаевлул гьайкалданучIату, Ваччавсса майданнив кIийла Виричу АхIмад-Хан Султаннул гьайкалданучIан бияннин­сса «БивкIу бакъасса полкрал» маршрая. Шикку хъунбутта­хъал, шяравучутурал, гъанссаннал суратирттащал гьуртту хъанай бия сайки циняв райондалул идарарттал къуллугъчитал, школалул оьрчIру, шагьрурдая бувкIсса хъамал. Ларххун бия чIявуми аьрали яннарду. Ва полкрал сакиншиндарай каялувшиву дуллай ия запасрай­сса аьралий майор,1999-ку шинал Дагъусттаннай хьусса дяъвилул гьурттучи, СумбатIуллал шяравасса Хизриев Шамххал.
Кьюкьлул хьхьичIминнавух бия Ккуллал райондалул бакIчи Сулайманов Саэд, ванал хъиривми Чупанов Адам, Илиясова Сабрина, Чаринов МахIаммад, Райондалул депутатътурал мажлисрал председатель Оьмаров Гъази. АхIмад-Хан Султаннул гьайкалдануцI Сулайманов Саэдлул ва Оьмаров Гъазил тIутIал шалкри бивхьуна. Вайннал хъирив дирхьуна махъминналгу михакрал тIутIив. Муния махъ хьуна Ххувшаврил кьинилун хас дурсса тяхъашивуртту.
Райондалул жямат Ххувшаврил кьинилущал барча бувна Сулайманов Саэдлул, Загьидиев Аьбдуллул, УО-рал бакIчи ХIаммакуева Альбинал, райондалул Жяматийсса палаталул каялувчи Маммаев Рамазаннул. Вайннал кIицI бувна Ккуллал райондалия Хъун дяъвилуву гьуртту хьушиву 2400-нния ливчусса чиваркI. Вайннавату зана къавхьушиву 1400 аьраличу. Къинттуллухсса давурттавух гьуртту хъанай бивкIшиву 1400 ливчусса хъами, къужри, оьрчIру. Вайннаватугу 100-ннийн бив­сса инсантал ливтIушиву къанаврттай. Яла ккаккан дуруна райондалул шяраваллал культуралул зузалтрал ва школалул оьрчIал архIал хIадур дурсса хъинну ххуйсса концерт. Шиккура, майданналул ца зуманив, дуллай бия саллатIнал ккурчгу (кашагу). Тяхъашивуртту лахъи ларгуна ахттакьуннин.
Байрандалиясса репортаж хIадур дурссар
ХIажимурад ХIусайновлул