Щалагу республикалий кунна, Аьрасатнал Президентнал бувчIавуртту Ккуллал райондалийсса щархъавугу ларгунни цукунчIавсса низамрава бувксса кIанттурду къавхьуну. Гьашинусса бувчIавуртту цукун най дурив ххал дуван лакрал шаннагу райондалийсса щархъавун бивунни «Илчи» кказитрал зузалт. Ккуллал райондалул ТИК-рал председатель МахIаммад АхIмадовлул кIицI лавгуна, гьашину чIявусса инсанталгу гьуртту хьуну, лавайсса даражалий ларгшиву Аьрасатнал Президентнал бувчIавуртту.

– Ва ххуллухь инсантал хъинну жаваблувну най бия Аьрасатнал Президентнахлу чIурду булун. БувчIавуртту шанма гьантлий най душивриягу агьалинан ва бувчIавурттал участокирттай зузиминнан хъуннасса къулайшиву дия. Райондалийн чIурду булун букIлай бия, республикалия бакъассагу, Аьра­сатнал шагьрурдай ялапар хъанахъисса ватанлувталгу. Чялишсса гьурттушинна дурна бувчIавурттавух райондалул азарханалул зузалтралгу. Вай шанмагу гьантлийн хъар хъанай бия билаятрал бучIантIимур. Цинявннал умуд бия бюхъу-цIакь бусса, оьлуркъусса тагьарданува жула хIукумат дуккан дансса каялувчи увчIинсса. Мукун хьуссар тIийгу ура, – увкуна МахIаммад АхIмадовлул.

Ваччавсса бувчIавурттал участокрай, ххишаласса сияхIравун бутансса аьрзагу чивчуну, нагу булав ттула чIу.
ЧIяйннал шяравусса Культуралул къатлуву тIиртIусса участокрай чIу булун увкIун ия «ЧаннацIуку» кказитрал корреспондент Арсен Аьбдуллаев.
Бивру жу Ккуллал райондалий чIявусса чIурду буллусса Ккуллал шяравусса участокрайнгу. Жу бувкIсса ппурттуву чIу булун увкIун ия хасъсса аьралий операциялий къучагъну жан дуллуссаЧувшиврул ордендалул кавалер Чаннанов МахIмуд тарбия увсса, ванал ниттил ппу Ризван Оьмаров.

Хъиривмур аьрххи хьуна жул Хъусращиял шяравун. Шиккусса бувчIавурттал участокрал председательну ия Марсел Сулайманов. ХIукуматрал бакIчинахлу чIурду булун бувкIун бия СВО-лий чувшиврий жан дуллусса,Къучагъшиврул ордендалул кавалернал нину Рабият Оьмаева ва цIанасса чIумал хасъсса аьралий операциялий гьуртту хъанахъисса Назим Оьмаев­лул ппу МахIаммад Оьмаев. Ва, оьрмулул угьара хьуну унугу цачIанма шаппай чIунил хъирив бучIаннин къаавцIуну, цува увкIун ия участокрайн.
– Вин захIмат къахьуншив­рул, жу вичIан шаппай бу­чIантIиссияв, инава увкIунна, – увкукун, МахIаммадлул: «На арс учIаннин кьянкьану ялугьлан аьркинссара, яхI буллай ура. УвкIра ттула бурж биттур бан, билаятрал бакIчинахлу чIу булун. Хъуннасса вихшалагу дур агьалинал лайкьсса кандидатнахлу чIурду булунссар тIисса», – увкуна.
Шиккува кIицI лаган, Назимлуя жун уттинингу цикссагу ххуйсса хаварду баяйва. Ванащал архIал къуллугърал бурж бартбигьлай бивкIсса жула лаккуоьрчIру буслай бия, Назим хъинну захIмат ххирасса, канива букъаккайсса пиша бакъасса, аьра­литуращалгу авкьусса, хъинну ххуйсса инсан ур тIий.

Оьрмулун къулайсса шартIру дакъасса окопирттаву ялапар хьун багьсса аьралитал, Назимлул кумаграйну, бувцуну ттукIгу, чIумуйнусса ялапар хьунсса шартIругу дузал дурну, аьралий бурж бартбигьлай бур. Лагма-ялттусса окопирттаву ялапар хьунсса шартIру дакъар тIий аьрзирайсса аьралитурахь командир ивкIун ур: «Бургияра ва дагъусттанлувнал дурсса давурттах, вагу зу кунасса аьраличуври, ваная эбрат ласияра», – тIий. Укун яхIлувсса буттал арс ур Назимгу.
Буттал шяраву, Хъусрахь, чIурду булун бувкIун бия «Илчи» кказитрал отделданул редактор Зулайхат Тахакьаева ва хъунасса аьлимчув, шаэр Абачара ХIусайнаевлул душнил душ Камила Абакарова.

Шамилчинсса кьини чIу булун бувкIун бия оьрмулул 90 шинавусса Халун Давдиева, ДР-лул Халкьуннал Мажлисрал депутат Камил МахIаммадовичлул нину. БувкIун бия Хъусращиял жяматран ххирасса ва бусравсса пенсионер Качар Акаевагу.
– На мудангу, бувчIавурттавух гьуртту хьуну, ттула граждан позиция ккаккан байссар. ХIакьину билаятран захIматсса чIун дур. Мунийн бувну, бачияра ккаккан даннуча жула цашиву, – увкуна ванил.

Хъусращиял школалул директор Гулайбат ХIажиевал був­чIавурттан хасъсса лишандалий бувну бия ххуйва-ххуйсса торт ва буркив. Вай хъинну бусрав хьуна зума итадакьлакьийни. БувчIавуртту нанисса шаннагу кьини комиссиялул члентурал ва ялув бацIаву дан бувкIсса ихтияр дуруччай органнал зузалтрал зумарду итадакьинсса дукрарду дурна Издаг Саидовал.
– Барчаллагь учин ччай ура вай душваврал бувсса захI­матрахлу. Шяраваллил жяматрал ххуйсса гьурттушинна дунни бувчIавурттал давривух. Оьрмулул бугьарасса, цIуллушиврул ссуссукьушиву дусса инсантурачIан шаппай занай бивкIру, минналгу чIурду булуншиврул. Бивру мащайсса хIухчалтрачIан ва дояркахъачIан, – увкуна Марселлул.

Цума-цагу инсаннал цала чIу буллунни ххуймунийн, ххаришиврийн вихшала дирхьуну. Аьрасат – гуж бусса билаятри. Билаятрайсса оьрму ялу-ялун ххуй хьуннав, хIукуматрал багьу-бизу цIакь хьуннав.

Имара Саидова