Декабрь зурул 30-нний Ккуллал райондалул хъун шяраву, Ваччав, тIайла дурккунни жуятура нанисса шин ва хьунадаркьунни ЦIусса шин. ЦIусса шин хьунадакьаврийнсса хIадуршинна дурну дия Ккуллал райондалул культуралул зузалтрал Ибрагьимова Маринал каялувшиврий. Майдандалийсса сахIналул хьхьичI бацIан бувну бия елка. СахIна цуппагу, ЦIусса шинан хас дурсса баннер ларххун, цайми чIюлушиннардугу дурну, бакьин бувну бия. Шадлугъ дайдирхьуна ахттая махъ.
ЦIусса шин хьунадакьин бувкIсса культуралул зузалт ларххун бия вацIлул жанавартрал нетIри. Ва иширалгу шадлугърал сий ягин дуллай, оьрчIан тяхъашиву хъанай дия.
Шадлугъ дачин дурну ия Дякъилттатта. Дякъилттаттану ия Хъусращиял шяраваллил халкьуннал театрданул режиссер Марсел Сулайманов. БатIаврий махъ лавхъуна Ккуллал райондалул бакIчи Шамил Рамазановлул, чIа куна цIуллушиву ва тIайлабацIуртту.
Яла Дякъилттаттал оьвкуна Марххаладушнийн. Марххаладуш бия Ккуллал райондалул культуралул къатлул зузала Асият МахIаммадова. Шадлугърай школалул оьрчIал бувккуна ЦIусса шинан хас бувсса шеърирду, увкуна балайрду. Ккуллал шяраваллил спортрал школалул чIава спортсменкахъал ккаккан бувна гимнастикалул номерду, хьуна цаймигу тяхъашивуртту. КIицI буван ччива шадлугърал гур дуллай бивкIминнал цIарду: Халисат Рамазанова, ХIабибуллагь Кьурбанов, Асият МахIаммадова, Шавлухъ СалихIова, Басират ХIусайнова, Гриша Ванатиев, Малик Оьмаров ва цаймигу.
Дякъилттатта бачIлай ия оьрчIайх нацIушивурттащалсса кьуцуртту. Елкалул лагма занай, балайрду тIий, къавтIий, тяхъашиву лахъи ларгуна. Барча хьуннав ЦIусса шин!
