Хьурттал шяравасса художниктал, уссурвал ХIасан ва ХIусайн Ссунгъуровхъал оьрму бяливчIун бур ванияр 50 шинал хьхьичI, 1973-ку шинал, автомобиль катастрофалуву. Га чIумал вайннан диркIссар 31-цара шин. Сайки щалва шагьру бувккун бивкIссар уссурвал махъва-махъсса ххуллийн тIайла буккан.
Ва бала-апатI хьуну махъ цукссагу хIаллай батIлай буссия республикалул творчествалул интеллигенция вай художниктурал аьпа учиншиврул. Укунсса батIавурттавасса цанний Дагъусттаннал халкьуннал шаэр Расул ХIамзатовлул кIицI лавгссия республика язисса художниктурацIа хьушиву. Зувиллий цара шинал мутталий уссурваврал Дагъусттаннан хъинну чIявусса бувссар, республикалул магьирлугъраву ликъаххайсса ххару кьабивтссар.
Уссурвал Ссунгъуровхъал 55 шинал юбилейран хасну республикалул кказит-журналлай дуркссия вайннал аьпа абад баврицIун дархIусса макьалартту. Амма уттинин га чIумалва кIицI лаглай бивкIсса сиптардава цавагу щаллу хьуну бакъар.
Уссурвал ХIасан ва ХIусайн ялапар хъанай бивкIсса къатрал чIирай аьпалул уларагу ларчIун дакъар.
Ттул пикрилий, къабучIиссар аьпалух укун биччибакъа буруглан. Вай ххаллилсса художниктурал цIарду зана дуван аьркинни вайннал цалва язими произведенияртту хас бувсса шагьрулувун. ДакIнийн бутияра: цIа дурксса ресторан «Лезгинка», кафе «Салам», шагьрулул бухмур автостанциялул къатри, ХIукуматрал къатрал чIира чIюлу буллалисса мозаикалул панно – вай цимурца вайннал творчествалул ахъулссар.
ХIасан ва ХIусайн Ссунгъуровхъал 1964-ку шинал къуртал бувну бур билаятрал художествалул ца яла сий думур, ца яла гужмур идара – Грековлул цIанийсса Ростовуллал художествалул училище. Дуккавугу щаллу дурну, зана хьуну, республикалул художествалул оьрмулуву ца яла хьхьичIунсса гьурттушинна дуллан бивкIссар.
КIинничалтрал давуртту хасъсса пишакартурал итталун дагьссар най дунура. Композициялул приемирттал кумаграйну вайннал цалла графикалул давурттаву чIалачIи буллай бивкIссар зунттал инсантурал багьу-бизу. Вайннал даврил кьяйда, стиль дурчIлачIи хьуссар.
Ссунгъуровхъая, Дагъусттаннал искусствалувусса цIусса лишан, цIусса хIасулшин хIисаврай, чичлан бивкIссар пресса, ласлан бивкIссар телевизион передачартту. ХIатта Совет художествалул энциклопедиялийгума чивчуссар вайнная. Чил хIукуматирттал изданиярттайгу дуркссар вайннаясса ярг-яргсса макьалартту.
1964-ку шинал Ростоврай хьусса «Советский юг» тIисса цIанилусса зональный выставкалий бивхьуссар уссурваврал произведенияртту.
1966-ку шинал тIурча, уссурвал Ссунгъуровхъал суратру хьуссар Москавлив, Щалагу Союзрал жагьилсса художниктурал выставкалий, ца шинавуннив – «Советская Россия» выставкалий. Оьрмулул 22 шиннаву жагьилтал кьамул бувссар СССР-нул Художниктурал союзравун.
Цавува бусса гуж, кьуват, ччаву, гьунар вайннал хас буллай бивкIссар Дагъусттаннан. Вайннал машгьурсса графикалул давурттал циклданун цIа диркIссар «Дагъусттаннахасса балай» тIисса.
Уссурвал Ссунгъуровхъул цалла давурттансса материал датIлай сайки щалла республикалийх бувкссар. Бивссар республикалул художествалул культуралул циняв центрдайн: Гъумучиял, Оьргърал, Бархъаллал, Аьндиннал, УнцIукIуллал, ГьацIатIуллал, Табасараннал, Ахттиял.
Пушкиннул кIичIиравусса вайннал дуссукъатта бачIвасса чIун тачIав къадиркIссар. Шиву хьунабакьин бюхълай бивкIссар цIанихсса художниктал Эдуард Путерброт, Анатолий Шарипов, Анатолий Ягудаев, Хайруллагь Кьурбанов, искусствоведтал Зумруд Жандарова, Мариян Чалабова, вайннал дустал МахIаммад-Загьид Аминов, Оьмари Оьмаров, Алекси Аьбдуллаев, уссурвал Увайсовхъул, Рамазан Хаппалаев, Айгун Айгунов ва м.ц. Шиву мудангу щуруй бивкIссар творчествалул оьрму, сакин буллай бивкIссар хIакьсса искусствалул произведенияртту.
Дагъусттаннал культуралул оьрмулувусса хъунмасса ишну хьуссар Расул ХIамзатовлул «Ттул Дагъусттан» тIисса луттирайнусса спектакль, цинсса сценографиягу дурсса уссурвал Ссунгъуровхъал. Ва даврин Дагъусттаннал ХIукуматрал лавайсса кьимат бивщуссар, Республикалул ХIамзат ЦIадассал цIанийсса премия дуллуну. Уссурвал Ссунгъуровхъул хьуссар ва премиялул яла жагьилми лауреатътал.
Цала творчествалул кутIасса оьрмулул мутталий художниктал гьуртту хьуну бур искусствалул личIи-личIисса журардаву. Вайннал сайки циняв давурттаву агьамми геройталну бур зунттал инсантал.
ХIасан ва ХIусайн бия дакIру хъинсса жагьилтал, цалла ватан ххирасса, ванил кьануннай ва аьдатирттай оьрму бутлатисса. Цанная ца личIигу къашайва. Вай кIулну бивкIсса цинявннанмагу дакIнийссар цуксса тяхъасса жагьилтал бивкIссарив вай.
Ссунгъуровхъул бивкIссар ва буссар Дагъусттаннал пахруну.
Умуд бур шагьрулул цIанасса администрациялулгу, республикалул художествалул организациярттал каялувчитуралгу, творчествалул интеллигенциялулгу вайннал дустурал сипталул (художниктурал аьпа абад баврил) чIарав бацIаву дуванссар тIисса.
Жанна МахIаммадова
Таржума
Бадрижамал Аьлиевал
