Тюменнал областьрай лахъа-хъунну кIицI ларгунни халкьуннал шаэр Расул ХIамзатовлул ттуршра шинал юбилей. Юбилейрал лагрулий 300-нниха ливчусса дуклаки оьрчIал, «Жува бюх­ттулсса билаятрал оьрчIруру» тIисса конкурсраву гьурттушинна дурну, бувккунни шаэрнал шеърирду.

Апрель зурул 24-нний тIурча, чIяву миллатру бусса билаятрал культуралуву ва жагьил­сса ник тарбия дувавриву Расул ХIамзатовлул творчествалул бувгьусса кIанттуя, мунал творчествалул биялалия бусласисса элмийсса конференциялул («Влияние идейно-художественного наследия творчества Расула Гамзатова на многонациональную отечественную культуру и гражданско-патриотическое воспитание молодого поколения») даву къуртал дунни. Ва Аьрасатнал лагрулийсса конференциялийгу докладру бунни Тюменнал, Москавуллал, Да­гъусттаннал аьлимтурал, чичултрал, культуралул вакилтурал, федерал экспертътурал.

Вай давурттал сиптачигу, модераторгу Тюменнал областьрайсса Дагъусттаннал ХIукуматрал вакил, техникалул элмурдал доктор, профессор, жула лаккучу Ярагъи Кьурбановри. Ва ур Расул ХIамзатовлул юбилейраха зузисса Сакиншиннарал комитетрал сопредседательгу. Конференциялий ихтилат буллай, Тюменнал областьрал губернаторнал хъиривчу Павел Белявскийлгу барчаллагь увкунни Ярагъи Кьурбановлухь, даву лавайсса даражалий дуван бувсса хIарачатрахлу. «Мудангу ляличIисса асарду бу­ххай дакIнивун оьрчIзаманнул бусалардащал хьунаакьайхту. Расул ХIамзатовлул «Кьурукьру» оьрчIнийва ттул оьтту-ттурчIаву цIакь хьусса образри. Дяъви къаккавксса, къакIулсса чIивисса оьрчIал дакIгума хъюлчай учин дуллалисса вай ххару ттун хъинну ххуйну дакIний бур, кьувтIунува бур. Бюхттул­сса гьунарданул залуннал творчество мудангу агьамссар. Да­гъусттаннал агьлу оьруснал агьулданущал ва цаймигу миллатирттал инсантуращал мудангу цачIу духIлай бивкIссар ялун дуркIсса захIматшивуртту. Бу­ттал кIанттул цIанийсса дяъвилул ппурттуву 50 дагъусттанлув лайкь хьуссар Совет Союзрал Вирттаврал цIардан», – увкунни Белявскийл, Дагъусттаннал ва Тюменнал областьрал хIала-гьурттушиву цIакь дувавриву Ярагъи Кьурбановлул хъунмасса бутIа бивхьушивугу кIицI лавгун.

– Жува хъунасса аькьилнал, хъунасса шаэрнал юбилей дуллай буру. Жува, буниялттунгу, ца билаятрал оьрчIруру, миллатру личIи-личIисса бухьурчагу. ХIамзатовлун хас дурсса ва элмийсса конференциялий ттун ттунма уттинин къакIулну бивкIсса затру кIул хьунни, ванал биографиялул ва творчествалул анализ куртIсса хьунни, – увкунни Ярагъи Кьурбановлул.
Мероприятиялий гьуртту хьунни шаэрнал гъанчу, тарихрал элмурдал кандидат, Аьра­сатнал ПрезидентначIасса Да­гъусттаннал Постпредстволул Жяматийсса советрал председатель ХIамзат ХIамзатовгу. Расул ХIамзатовлул творчествалуву аьралий тема цукун куртIну аьч дурну дуссарив бувсунни филологиялул элмурдал кандидат, Тюменнал аьралий инженертал, командиртал хIадур бувайсса маршал Прошляковлул цIанийсса училищалул доцент Алексей Барыкиннул.

ХIамзатовлул творчествалун бюхттулсса кьимат бишлаши­сса ихтилатру бунни Тюменнал областьрал Думалул комитетрал член Лариса Цупиковал, Тюменнал областьрал Жяматийсса палаталул председатель Геннадий Чеботаревлул ва цайминнал. Ахирданий Расул ХIамзатовлул творчествалун хас бувсса конкурсирттай ххув хьуминнан ва лауреатътуран ХIурматрал грамотарду дуллунни. СахIналий экьи най бия шаэрнал мукъурттийсса балайрдугу, ккалай бия мюрщиминнангу, хъуниминнангу ххира хьусса шаэрнал назмурду. Концерт къуртал дурна Да­гъусттаннал ва Тюменнал коллективирдал къавтIаврил номердайну.

«Хъунмасса пахру багьлай бия Тюменнайсса дуклаки оьрчIангу, цинявннангу Расул ХIамзатовлул творчество ххуйну кIулну душиву, областьрал хъуниминналгу шаэрнал юбилейрах къулагъас дуллай бушиву чIалай. Вагу хьунни зунттал билаятрал бюхттулсса арснал цIа абадлий личIантIишиврул барашин дуллалисса даву, агьали билаятрай бавкьуну, нахIуну, куннал кув бувгьуну зунгу, яхъанангу аьркиншиву исват буллалисса давуну. Расул ХIамзатовлул творчествалул гьанумур мурадгу мукунсса бур, – увкунни Ярагъи Кьурбановлул телефондалувух «Илчилул» корреспондентнахь.