ЦIусса хияллащал цIусса ххуллийн
Ккуллал райондалий 14 шин хьусса дуклаки оьрчIайх бавчIунни паспортру. МуницIун бавхIуну Ваччиял шяраву хьунни хъун дакъасса шадлугъ.
Дуклаки оьрчIан тIайлабацIу чIа учин бавтIун бия райондалул администрациялул зузалт, школалул коллектив, мачча-гъанми ва дуклаки оьрчIру. Паспортру ласласисса дуклаки оьрчIру барча бан Аьрасатнал гимнрахун гьаз бунни ятIул ттугъ, оьрчIалгу, цайнна дуллалисса вихшалагу, тIалавшиннагу тасттикь дуллай, Аьрасатнал билаятрайн хIакьшиврийнусса хъа бунни.
Ххарисса асардащал ва цIусса хияллащал дуклаки оьрчIру бувккунни цIусса ххуллийн. Паспортрал агьамшиврия ва тIалавшиндарая дуклаки оьрчIахь бувсунни учитель Марзият Макьсудовал. НасихIатрайсса махъру лавхъунни хъамаллурал, личIи-личIисса идарарттал зузалтрал ва нитти-буттал.
Райондалул администрациялул чулуха оьрчIру барча бунни администрациялул бакIчинал хъиривчу Анатолий Давдиевлул. Ванал бувсунни паспортрацIун бавхIусса кодексрая, законная ва дуклаки оьрчIал ванияр тихуннайсса ихтиярдая ва тIалавшиннардая.
ДакIнийн бутан, АьФ ГК-лийн бувну, 14 шиннавусса оьрчIахь дуссар авторнал право ишла дуллансса ихтияр, произведенияртту чичлансса, суратру дихьлансса, ци-дунугу ляхъан дуллансса ва ссаха-бунугу цала измулий зунсса ихтияр, банкрай харжлугъ ишла дан бучIишиврийнусса ихтияр, мукунна дарсирдая махъ ягу каникуллай даврий зунсса ихтияр.