Дагъусттаннал изобразительный искусствардал П.С. ХIамзатовал цIанийсса музейраву тIиртIунни Аьрасатнал Художествалул академиялул член-корреспондент, Аьрасатнал лайкь хьусса художник Аьбдулзагьир Мусаевлул ва Даггоспедуниверситетрал художествалул-графикалул факультетрал выпускниктурал «Графикалул мифология» тIисса цIанилусса выставка.
Ва тIитIлатIисса шадлугърай ихтилатру бувна Дагъусттан Республикалул культуралул министр Зарема Буттаевал, музейрал директор СалихIат ХIамзатовал, Даггоспедуниверситетрал ректор Нариман Асваровлул, Аьрасатнал Художествалул академиялул хIурматлувсса член, искусствоведениялул кандидат Наталья Мусаевал, Аьрасатнал халкьуннал художник Гейбат Гейбатовлул ва м.ц.
Ккаккиялун дирхьуну дия художникнал цалла личIи-личIисса шиннардий дирхьусса 50-нния лирчусса давуртту ва ванал 9 выпускникнал 23 даву. Мукун, ванал суратирттал чIарав дия Аьзиза Сулаймановал ва Тимур Мусаев-Каганнул (1999-мур шинал выпуск), Исмяил Исмяиловлул ва Инесса Гьимбатовал (2003-ку шинал выпуск), Закарья Закарьяевлул ва Наталья Савельевал (2004-ку шинал выпуск) ва цайминнал суратру.
Выставка тIиртIуну дикIантIиссар майрал 9-ннийнин.
