ПаччахIлугърал Думалул депутат, Мюхчаншиврул ва коррупциялийн къарши бацIаврил комитетрал председательнал хъиривчу Ризван Кьурбанов лаивзунни цинявппагу цала коллегахъайн, хасъсса аьралий операциялул ветерантал давурттай бацIан бан кабакьу бара тIий.

Ванал цалагу кьамул бунни цала кумагчиталну спецоперациялуву щавурду дирсса кIия ветеран. Ризван Кьурбановлул тIутIимунийн бувну, вай зунтIиссар цивппа кунмасса спецоперациялул ветерантуран ва гьурттучитуран кумаг буллалисса давурттаха ва миннуцIунма бавхIусса цаймигу масъаларттаха, цанчирча вайннан кунма щинчIав къакIулссар ци кумаг аьркинссарив спецоперациялуву гьуртту хьуминнан ва хъанахъиминнан.
СВО-лул гьурттучитал парламентрал давривун кIункIу бансса пикри ванан багьну бур Аьрасатнал Президентнал Федерал Мажлисрайнсса оьвчаву дурсса чIумал. Спецоперациялуву жанну дуллусса аьралитурал ва тикку мушакъат хьуминнал чIарав бацIаврил масъала гьаз буллай, Президентнал баян бунни гьарица кулпатрацIун, гьарица ветераннацIун цана-цанасса соцработник, координатор цIакь увну икIан аьркиншиву.
– Ттун дакIний бур Дагъусттаннал вице-премьерсса чIумал нава авгъан дяъвилул ветерантурал масъалартту щаллу бан кумаг бувсса. Миннал кIива барз хьуну бия шагьрулул майданнив буклай. На дахьва ивтун ияв къуллугърай. Увккун минначIан, ихтилат бувссия. Цала масъалартту щаллу баврил хIакъираву миннал тIайла бувккуна ттучIан шама вакил, цинявппа масъаларттугу закондалул ххуллий щаллу бувна.
Цала Рисалалуву Президентнал кIицI лавгунни цинявппагу СВО-лул ветерантал ва миннал кулпатру аякьалийн лавсун бикIан аьркиншиву. Мунийн бувну, цинявппагу даражалул депутатътуран, сенатортуран ва къуллугъчитуран пикри бан аьркинни Президентнал увкумур цукун щаллу бан бурив, – тIий ур Ризван Кьурбанов.