[dropcap]В[/dropcap]ай гьантрай отпускалий шавай увкIунни мобилизациялул хьуминнавух хасъсса аьралий операциялуву гьуртту хъанай ивкIсса Шамил Баймурадов. Ва иширан хасну аьраличунал гъан-маччанал дурсса мавлудрай гьуртту хьунни ЦIуссалакрал райондалул бакIчи Сулайман Рамазанов, ванал хъиривчу, ЦIуссалакрал шяраваллил бакIчи Сулайман Оьмаров, аьраличунал дустал, шяраваллил жямат.

ЦIуссалакрал райондалул жяматрал цIания Сулайман Рамазановлул барчаллагь увкунни аьраличунахь ва мунал нитти-буттахь, кIицI ларгунни аьраличунал къучагъшиву.
Мавлудрайн бувкIминнал кIицI лавгунни билаятрал мурадру буруччаврил цIаний аьралий операция чара бакъа бан багьлай бивкIшиву. Шамиллул бувсунни цува ххюва зуруй, Ватандалул мурадру буручлай, аьра­лий операциялуву гьуртту хьушиву ва тачIав мобилизациялул шаврия пашман къавхьушиву.

Аьралий операциялуву гьур­тту хъанахъиссаксса хIаллай Шамиллул ккаккан дурну дур цала чувшиву, яхI бушиву. Аьрасатнал Президент Владимир Путиннул ХIукмулийн бувну, ванан дуллуну дур IV-мур даражалул Георгийл ххачлил орден.
Райондалул бакIчинал кIицI лавгунни цивппа ччимур чIумал аьраличунал гъан-маччами кьамул бан, миннан кумаг бан хIадурну бушиву.