Ватан дуруччултрал кьинилуцIун бавхIуну, Дагъусттаннал Рос­гвардиялул вневедомственный къаралданул зузалт гьуртту хьунни «Ленточка памяти» тIисса патриот акциялуву.

Акция хьунни МахIач­къа­лалий, Лениннул комсомолданул ц1анийсса паркраву. Ва сакин дурну дия «Ххувшаврил волонтертал» тIисса щалагу Аьрасатнал жяматийсса суккушиннарал региондалул отделениялул. Мероприятиялий гьуртту хьунни Аьрасатнал Виричу, I999-2004-ку шиннардий МахIачкъалаллал ОМОН-далул командирну ивкIсса милицанал полковник Загьид Загьидов, МахIачкъалаллал администрациялул вакилтал, республикалул жяматийсса ва жагьилтурал организациярдал члентал.
Митинграл гьурттучитал Ватан дуруччултрал кьинилущал барча буллай, Загьид Загьидовлул кIицI лавгунни ва цинявппагу инсантуран бусравсса, жула билаятрал тарихрацIун ва ватан дуруччайсса къучагътурацIун дархIусса байран душиву.
— Ватандалияр хьхьичIунсса цичIав дакъассар. Му кIулну бивкIссар жула буттахъангу, буттал буттахъангу. ХIакьинугу жуйнна Ватандалул цIаний бацIансса кьини дурккунни. Щак бакъар, буттахъул эбрат хьуну, жула аьралитал, циняв захIматшивурттугу дурхIуну, цIуллуну, сагъну ша­ппай зана хьуншиврий, — увкунни Загьид Загьидовлул.
Мероприятиялул гьурттучитурал баян бунни минутрайсса пахъ багьаву, дирхьунни тIутIив Аьраличунал гьайкалдануцI.