ЦIуссалакрал райондалул кIулшивуртту дулаврил идарарттал жяматийсса суккушиндарал активистътурал ва юнармейцынал чялишсса гьурттушинна дуллай бур Украиннал аьрщарай нанисса хасъсса операциялуву лайкьсса даражалий цала бурж биттур буллалисса аьралитурал цIанийсса акциярттавух.

Ва ххуллух ЦIуссачIур­тта­щиял школалул ва ЦIусса­лакрал гимназиялул дуклаки оьрчIру гьуртту хьунни «Посылка солдату» ва «Письмо солдату» тIисса акциярттавух. Посылкартту ва ча­гъарду бивну махъ, операция нанисса зоналий гьуртту хъанахъисса «Юнармия» тIисса Щалагу Аьрасатнал оьрчIал ва чIава жагьилтурал аьралий-патриот су­ккушиндарал хъунама Жавдин Жамиевлул, видеосвязьрайн увккун, барчаллагь баян бунни райондалул дуклаки оьрчIайн.
Шиккува кIицI лаган, ЦIу­ссалакрал райондалул кIул­шивуртту дулаврил идарарттал каялувчитал мудангу чялишну гьуртту хъанай буссар вай акциярттавух.