Алик Гъазиевлул ссил душнил Ххадижал цила оьр­мулул кIира шин бартларгсса кьини цалчин зумух лавсун бур «дядя» тIисса махъ. …
Аликлун цанмарив чIивитIу ккакканмагу нясив хьуну ба­къар: цал лахъисса командировкарттай ва учениярттай ушиврийн бувну, яла тIурча, хасъсса аьралий операция байбивхьуну.
Уттирив Владиккавкказуллал пехоталул чумартсса талатала, чIавама сержант Алик Гъазиев суратирттая ур чIивитIух уруглай. Цуппагу бия тIар, суратру канища щяв къадихьлай, миннущал гъалгъа тIий.
Асар хъанай бухьун­ссия чIи­витIун цуксса чIурусса диркIссарив ниттиуссил цихрасса ччаву, цуксса хъихъи ласунтIий бивкIссарив ганал цуппа.
Ниттирссин ПатIиматлун Ххадижат лявкъуну бур Аликлул къатлуву, ганал суратру дусса столданул хьхьичIсса к1анттуйгу щябивкIун, пашманну гайннух ялугьлай. Нузах цуппа видеолийн ласласисса ПатIимат ххал хьувкун, чIивитIу бур, Аликлул суратрайх кагу дуклай, «дядя» тIий, ккаккан уллай. Яла тIурча, кьинибархан бия тIар, ярглийх суратругу ласлай, гайннущал гъалгъа тIий.
Алик ия мукьва ссил дянив увагу усса ца арс, Ххадижал увагу усса ца ниттиуссу. Ганал цащава шаймур бувссар чIивитIул оьрму дакьаву дусса аьрщарай бутаврил ххуллий. Дуллуссар, хIайп къакуну, цалла жагьилсса жан, цала хъирив виричусса аьпа ва цIагу кьариртун. Амма ссалчIав къабугьантIиссар чIивитIун ниттиуссил кIану.
ТалихIрайн букканнав чIи­витIу! Къаккакканнав тачIав ганил никиран дяъви! Къабагьаннав миннан, ххарисса дакъа, макь рутIин!
Олег Марзоев,
запасрайсса хIаписар