Ссайн-дунугу (янналийн, нузал киянттуйн, чяйникрайн ка щуний, цаннал цаннахьхьун ка дуллу­сса чIумалгума, ваца ток бивщу­сса кунмасса асар шайшиву кIулхьунссар чIявуссаннан, хаснува кIинттул. Ванийн «статическое электричество» тIий бур. Вания инсаннан личIисса нигьачIишиву дакъанугу, гьарца ток бивщутари тIааьн ба­къасса асар загьир шай.
Хъиннура гужсса электризация дикIай синтетикалулми янналул.

Электричествалул ток цавухва къаитабакьайсса затирттай цачIун хъанан дикIайссар тIар зарядру. Амма вай затирттал бакъар инсаннайх ток бишлашиссача, инсанная цаятувар му бишлашисса. Инсаннал чурххайгу салкьи хъанахъиссар электричествалул зарядру, чур­ххайсса бурчул ялттусса мюршсса чIарардайн бувну, лархсса янналийн бувну. Инсаннал ссайн-дунугу (щийн-дунугу) ка щусса чIумал, разряд хъана­хъиссар.
Зарядру къашайссар хлопчатобумажный яннардай, тIаннуй, пюрундалий.

Циванни кIинттул ток хъиннува чIявуну бишлашисса?

КIинттулсса лахъсса элект­ри­зация кьатIув дархIуну ди­кIай­ссар дякъицIун, къатлувумур – гьава биялну хъавтун бакъашивруцIун. КIинттул жува, хъунмурчIин, щябивкIун буру нажагь бакъа марцIсса гьава къабухлахисса къатраву (кабинетирттаву), лирчIми хъатругу кьакьан дуллай дур отоплениялул.
КIинттул жуйра дикIай электрический зарядру сакин дуллалисса чIярусса янна, хаснура синтетикалулсса ва ппалулсса.
КIинттул жулла лажиндарал, каруннил бурчу, бакIрайсса кIиз кьавкьун бикIай.

Зарядру салкьи къахъананшиврул

Къатлувусса хъатру 40-50% яларай дагьан дитан къа­бучIиссар.
Гьава хъатан буван ишла дувара хасъсса затру – увлажнителлу ва ионизаторду. Вай дакъахьурча, лавхъсса батареялул, пачлил чIарав щинащалсса затру дирхьуну, ва цаймигу кьяйдардай хъатан бувара гьава.
ЧIун-чIумуй тIивтIуну чIа­вахьулттив, къатлувун марцIсса гьава буххан булувара.
Каруннайх крем дулуккира, токгу къабищун, каруннил бурчугу хъатан буван.
Бюхъавай, лахлахира хлопчатобумажный янна, ишла дуллалира янна вилагайсса кондиционер. БакI зеххира тIаннул ттаралунних. Янналул лултту чулийн булучIара къуппаххалаххи.