Уттигъанну ЦIуссалакрал райондалул бакIчинан кIанайсса Сулайман Рамазановлущал хьунаавкьунни мобилизациялул хьуминнавух Украиннал аьрщарай хасъсса аьралий операциялуву гьуртту хъанай ивкIсса ХIажиаьбдулла Валиев.
Ва, щаву дирну, операция бан ватандалийн увкIун ур. Райондалул бакIчинахь ванал тавакъю бунни цала къатрал чIаравсса кIичIираву чирахъ бишияра куну, мукунма лак цIусса миналийн бизан баврил ва Аухуллал район цIу дуккан даврил программалул лагрулий цанна къатри даврил документру щаллу бан кумаг бувара куну.
Лак цIусса миналийн бизан баврил масъаларттал хIакъираву Дагъусттаннал ХIукуматрал Управлениялийн уккайсса райондалул администрациялул жаваблувсса зузала Аьбдурашид Буттаевлуйнгу оьвкуну, ХIажиаьбдулла Валиевлун къатри дан кумаг бан увкунни. Чирахъ бишаврилмур масъала ччясса чIумул мутталий щаллу бан ЦIуссалакрал шяраваллил бакIчи Сулайман Оьмаровлуйн тапшур бунни.
КIицI лаган, нюжмардул хьхьичI ХIажиаьбдуллал коммунал хIаллихшиннардахсса буржру райондалул хъуниминнал цала арцух лавхъссар.
