Театр – оьрчIан

Республикалул театрдал ккаккан бунни оьрчIансса личIи-личIисса спектакллу. Вай гьантрай вайннуйн бувкIун бия рес­публикалул шагьрурдаясса ва районнаясса 200-нния ливчусса оьрчIру.
Дагъусттаннал опералул ва балетрал театрданул ккаккан бувсса «Дюймовочка» мюзиклданул цалчинсса тамашачиталну хьунни хасъсса аьралий операциялул гьурттучитурал оьрчIру. Мукунма М. Горькийл цIанийсса Оьруснал драмалул театрданул «АцIния кIива барз». Оь. Батирайл цIанийсса Даргиял музыкалул ва драмалул театрданул «Ттатта Пихто ва Дя­къил Ттатта» ва цаймигу спектакллал тамашачиталнугу.

Культуралул министрначIан шикаятрай

Дагъусттан Республикалул культуралул министр Зарема Буттаевал кьамул бувунни агьали. Ва кьини министрначIан бувкIун бия культура, творчествалул проектру хьхьичIуннай даврийн багьайсса масъаларттащал.
Шаэр ХIабиб Давудов увкIун ия министрначIан яру мазрай­сса цалва «Хъамадиртсса щархъив» тIисса луттиращал, вайннал дянив хьуна фольклорданул аьдатру дуруччаврийн багьайсса ихтилат.
«Горцы Кавказа» тIисса ансамбльданул каялувчи Ислам МахIаммадов увкIун ия министрначIан чIава солистътуращал.
Аьрасатнал лайкь хьусса артистка Бурлият Эльмурзаевал министрнащалсса ихтилатраву гьаз бувна ттизаманнул балайчитурал сахIналийсса зана-кьулушиндарайн ва авторшиврул ихтиярду къадуручлай бушиврийн багьайсса масъалартту.

ХьхьичIунминнан бахшишру

Поэзиялул театрдануву хьунни шинал мутталий ли­чIи-личIисса конкурсирттай хьхьичIун ливчусса республикалул чIава гьунарчитуран ва вайннал педагогтуран культуралул министр Зарема Буттаевал бахшишру дуллалисса батIаву. Ва кьини шиккун оьвкуминнан дуллуна Культуралул министерствалул чулухасса ХIурматрал грамотартту ва Барчаллагьрал чагъарду. Мукунна дуллуна Дагъусттан Республикалул Халкьуннал Мажлисрал депутатътал Ислам ХIусайхановлул ва МахIаммад Садулаевлул чулухасса бахшишругу.
«Школьниктурансса культура» тIисса цIанилусса проектрал гьурттучину хьусса республикалул искусствардал мукьва школалун дуллунни хасну Аьрасатнал Федерациялул Культуралул министерствалул чулухасса бахшишру.

«ЦIушинал десант»

Ва цIанилусса акция хьунни Дагъусттаннал паччахIлугърал опералул ва балетрал театрдануву. Дякъил Ттаттал ва Марххала Душнил, мукунма магьрава­сса персонажтурал яннарду лархсса артистътал, Р. ХIамзатовлул проспектрая байбивхьуну, шагьрулул Хъун майданнив лавгуна, ххуллий хьунабавкьуминнахь ЦIушинал байрангу барча дуллай.

Язими къавтIалтран

ДР-лул ХIукуматрал председатель Аьбдулмуслим Аьбдулмуслимов хьунаавкьунни «Лезгинка» ансамбльданул коллективращал. ХьхьичIун ливчусса къавтIалтран премьер-министрнал дуллуна Дагъус­ттан Республикалул ХIукуматрал чулухасса ХIурматрал грамотартту.

Щаллу бунни чIиви душнил хиял

«Хияллал ёлка» тIисса цIа­нилусса ихIсандалул акциялий гьуртту хьуну, культуралул министр З. Буттаевал щаллу бунни оьрмулул 14 шинаву­сса Марият Идрисовал хиял – телевизор.
ДакIнийн бутан, «Хияллал ёлка» хъанахъиссар билаятрал Президентнал сипталийну щаллу дуллалисса проект. Ваний гьуртту хъанахъисса къуллугъчитурал, политиктурал щаллу бувссар цIуллушиврул ссуссукьушиву, ахIвал-хIал кIюласса ва аьралитурал кулпатирттава­сса оьрчIал хияллу.

Жяматийсса советрал даврил хIасиллу

Республикалул Культуралул министерствалучIасса Жяматийсса советрал дунни махъсса шанна шинал лажиндарай дур­сса давурттал хIасиллу. Вайннуясса ихтилат хьунни министр Зарема Буттаевал ва Жяматийсса советрал председатель, «Дагъусттан» ГТРК-лул председательнал хъиривчу Ссалам Хавчаевлул дянив.
Шаннагу шинал дянив Советравун бухлахиминнал ххал бигьлай бивкIссар республикалул театрдал репертуардайн, республикалул оьрчIал искусст­вардал школардал даврийн багьайсса ва чIявусса цаймигу масъалартту.

ЦIушинал чIюлушиннарду

Республикалул лагрулий дуллалисса цIушинал чIю­лушиндарал (игрушкардал) «Най дур жучIанна байран» тIисса цIанилусса выставкалий дурсса гьурттушиндарахлу Культуралул министерствалул, Дуккаврил ва методикалул центрданул чулухасса бахшиширттан лайкь хьунни Хьурттал шяравасса Саимат Бариева – МахIачкъала шагьрулул оьрчIал художествалул школалул педагог.
Мукунма вай ЦIушинал гьантрай Саимат лайкь хьунни Санкт-Петербург шагьрулий хьусса Дунияллул халкьуннал дянивсса искусствалул ва творчествалул «КIинтнил занг» тIисса цIанилусса фестивальданул чулухасса Барчаллагьрал чагъарданун.
Ва бакъассагу, ларгсса шинал ахирданий Саимат лайкь хьуссия Аьрасатнал лагрулийсса «Самородки России – 2022» тIисса конкурсрай «Яла ххуйма педагог» тIисса цIанин.

«ЦIушинал открыткартту»

Республикалул Культуралул министерствалул ва Халкьуннал творчествалул къатлул сакин дурну, МахIачкъала шагьрулул администрациялул Культуралул управлениялул кабакьаврийну, хъун майданнив хьунни «ЦIушинал ссаламрал чагъарду» цIанилусса концерт.
Т. Мурадовлул цIанийсса Дагъусттаннал паччахIлугърал филармониялул ва оьрчIал вокалданул «Аквамаринки» тIисса группалул солистътурал щаллу бувна личIи-личIисса номерду.
Шиккура ккаккан дуруна совет заманнул мультфильмругу.

Лакрал театрданул «Айболит»

Хасъсса операциялуву нину-ппу ливтIусса, аьралий ишру нанисса кIанттавату бувцуну бувкIсса ва цIуллу-сагъшиврул ссуссукьусса оьрчIан Лакрал театрданул ккаккан бувунни А. Усачевлул «Айболит» спектакль. Вания махъ хьунни Дякъил Тта­тта ва Марххала Душ гьурттусса оьрчIансса шадлугъгу.