«Дагъусттан» Москавуллал Культуралул центрданул президент Арсен ХIусайновлул тапшур бувну, Москавлив ва Москавуллал областьрай зузисса Дагъусттаннал хIакинтурал Ассоциациялул каялувчи Гулизар Башанаева бакIчисса группа – Пери Магриева, Марина Мурачуева, МахIаммад МахIаммадов, Рамазан ЦIаххаев ва Сагид МахIаммадов, бивунни Украиннаву хасъсса аьралий операциялуву щавурду дирсса Дагъус­ттаннаясса аьралитурачIан.

А.А.Вишневскийл цIанийсса Аьрасатнал Обороналул министерствалул госпитальданий хIакинтал хьунабавкьунни Табасараннал райондалийсса Пилиг шяравасса Малик Исмяиловлущал, Мачада шяравасса Аьбдулла ХIажиевлущал, мукунма Къарачай-Чаргаснавасса, Чачаннавасса, Красноярскалиясса, Волгоградраясса, Башкирнава­сса аьра­литуращал.
«Барс» роталул командир Малик Исмяиловлун 37 шин дур. Ччаннайн захIматсса щаву дирну унугу, дакI гъаргъун акъар. Ва ур буслай Украиннаву чIявусса да­гъусттан оьрчIру бушиву ва тай циняв къучагъну талай бушиву.

Аьбдулла ХIажиев аьралуннавун увцуну ур Хабаровскалия. Ванал нину-ппу Тюменнал областьрай Когалым шагьрулий ялапар хъанай бур. Госпитальданийн лавг­сса жула хIакинтал му ппурттуву арснах уруган увкIсса Аьбдуллал буттащалгу хьунабавкьунни. Аьбдуллал командирнал бусласимунийн бувну, ванан «Къучагъшиврул орден» дулун ккаккан бувну бур.
ХIакинтал бувкIун бур аьра­литурачIан шарда дурсса Да­гъусттаннал дукрарду, ахъул­сса ва нацIу-кьацIу ларсун. Яла-яла жагьилтал ххари хьунни хIакин МахIаммад МахIаммадовлул кулпатрал гьан бувсса яруссаннал ххункIлия.

Жагьилтал бур, госпитальдания буккайхту, махъунмай цала аьралий бурж бартбигьлан зана хьунтIишиву буслай.