Гьарцагу шинал декабрьданул 9-нний жула билаятрай хьунадакьай Ватандалул Вирттаврал кьини. Ва кьини халкьуннал дакIнийн дичай тарихраву вирттаврал дурсса къучагъшивуртту, лахъа-хъун бувай ларайсса наградарттан лайкь хьусса, Ватандалул цIаний жанну дуллусса вирттал.
Ккуллал райондалулми виртталгу личIи-личIисса чIуннардий дуручлай бивкIссар ва буссар билаятрал тархъаншиву ва цашиву. Вайннал цала эбратнайну ккаккан бувссар цуксса агьамссарив цума-цагу инсаннал бияла билаятрал тарихраву.
Ватандалул Вирттаврал кьинилун хасну МО «Кулинский район» ГБУ ЦСОН-далул зузалт бивунни мобилизациялул хьун бувминнал ва Украиннаву хасъсса операциялуву ливтIусса аьралитурал кулпатирттавун. Центрданул зузалтрал цIухху-бусу бунни цIуллу-сагъшивруцIун, ичIува аьркиншиндарацIун бавхIусса масъаларттая ва кумаг бунни дуки-хIачIиялийну. Бувсунни цивппа мудангу чIарав бацIан хIадурну бушиву.
«Вирттал халкьуннал дакIурдивур бусса»
Ккуллал райондалул Культуралул центрданий хьунни Ватандалул Вирттаврал кьинилул хас дурсса «Вирттал халкьуннал дакIурдивур бусса» тIисса вечер.
Мероприятие сакин дурну дия КДЦ-лул райондалул К1улшиву дулаврил управлениялуцIун цачIуну.
Ва дайдирхьунни дяъвилул балайрдахун Вирттаврал аллеялий тIутIив дишаврийну. Хъирив бавтIцири бувкIунни ва кьинилун хас бувну чIюлу дурсса къатравун. Мажлис бачин бувна отставкалийсса майор Щамхал Хизриев. Ванал бувсуна укунсса журалул мероприятиялул мяъна-мурадрая ва вайннул жагьилтал буттал кIану ххирану тарбия бавриву хъунмасса кIану бугьлай бушиврия.
Хъусращиял шяраваллил школалул директор АхIмадов ЩайхахIмадлул, Ккуллал шяраваллил 1-мур школалул директор Чаринов МахIаммадлул ва 2-мур школалул директор Мурачуев Аьбдуллул барча бувна бавтIцири ва тарихраву агьамшиву дусса даталущал. Дуклаки оьрчIал дурккуна назмурду, бувсуна шяравучутурая-вирттаврая.
Культуралул центрданул артистътурал щаллу бувна вирттавран хас бувсса балайрду.
«Вирттал – жул дакIурдиву»
Ватандалул Вирттаврал кьинилун хасну «Вирттал – жул дакIурдиву» тIисса цIанилу КДЦ-лул ЧIяйннал филиалдануву хьунни мероприятие. Ва, хIадургу дурну, дачин дурну бия филиалданул хъунмур СалихIат Алхасова. Ваний гьурттушиву дунни культуралул зузалтрал, дуклаки оьрчIал ва учительтурал. Совет Союзрал Виричу ЦIаххай Маккаевлул гьайкалданучIа райондалул вирттаврал суратирттащал бавцIуну бия дуклаки оьрчIру. Вайннал дурккуна назмурду, увкуна балайрду. Ялун нанисса никиран бюххансса ихтилатру бувна тарихрал учитель Ф. Айдаевал, Хъунисриннал советрал председатель М. Апанниевлул. Культуралул зузалтрал щаллу бувна вирттаврахасса балайрду.
«Вирттал буссар жула лагма-ялтту»
КДЦ-лул Хъювхъиял филиалдануву хьунни Вирттаврал кьинилул хас бувсса «Вирттал буссар жула лагма-ялтту» тIисса акция. Дуклаки оьрчIал дурккунни вирттаврахасса назмурду, бунни ихтилатру ва бувсунни вирттаврая оьрмулул ххуллурдая.
– Ва хъанахъиссар бюхттулсса байран, ванийну ялун нанисса никиран кIул хъанахъиссар жула тарих, дакIнийн бичлачисссар бусравсса вирттал, дуклаки оьрчIаву чантI тIутIиссар чаннасса асарду, – увкунни филиалданул хъунмур Рукьижат Оьмаевал.
Гьурттушиву дунни мукунна Амина МахIаммадовал, Ата Оьмаевал, ПатIимат Исяевал, Мустапа Оьмаевлул.18
