Ноябрьданул 10-нний жура кIицI лагару Полициянал кьини.
Ва захIматсса, нигьачIишиву думиннувасса цаннин ккаллисса
пиша язи бувгьуну, цалва оьрмулул гуж ва кьуват мунин харж
буллалиминнавух къачансса бур жулва лакгу.

Архсса Пермь шагьрулий ччянива миналулгу хьуну, личIи-личIисса миллатирттал ва диннал инсантурал дянив хIурматрай ва бусраврай бур Хьурттал шяравасса уссур­вал, полициянал подполковниктал – Руслан ва Ринат БижитIуевхъулгу.

Цал ца-кIива махъ учин ччай бур вайннан багьайсса тарбиягу дуллусса, дуккингу бувсса вайннал нитти-буттая. Армиягу лавхъун, Хьурттал шярава­сса Аьбдулла цала хъунама ­уссил Исмяиллул хъирив ивзун ур Избербаш шагьрулийн. Пенсиялийн укканнинсса Аьбдуллал сайки щалва захIматрал ххуллу бавхIуну бур нефтяникнал даврицIун. Зий ивкIун ур «Дагнефть» АТП-лий КамАЗрай щупирну, бригадирну, ивну ур чIявусса кIанттурдайн, Ух­ссавнил Ккавкказнавурив ванал ша къабивзсса кIанувагу бакъар. Аьбдулла хъанахъиссар Дагъус­ттаннайсса КамАЗрал цалчинсса щупир, ва машинагу цалва Бакуяту бувцуну увкIун ивкIун ур. Ванал кулпат, ЦIуссалакрал райондалийсса Гьамиящиял шяравасса Маликат, зий бивкIун бур «Гидросталь конструкция» заводрай бухгалтерну. Пенсиялий­сса Аьбдулла ва Маликат цIанагу ялапар хъанай бур Избербаш шагьрулий.
Бувну бур уссурвал Избербаш шагьрулий: Руслан – 1973-ку шинал, Ринат – 1977-ку шинал. КIинналвагу къуртал бувну бур шагьрулул 3-мур школа. Ватандалул хьхьичIсса цалва бурж лахъан армиялийн лавгун, Руслан къуллугъ буллай ивкIун ур Пермь шагьрулий, Аьралий институтраву. Демобилизациялия махъ зун ивкIун ур тийхва виваллил иширттал органнай – Пермь шагьрулул Орджоникидзевский райондалул отделданий, махъ – Пермь шагьрулул виваллил иширттал управлениялий уголов розыскрал оперативно-сыскной отделданул начальникну. Каялувчинал къуллугърайнсса кадрардал резервравусса Руслан махъ ивтун ур шагьрулул Дзержинскийл райондалул отделданул начальникнал хъиривчувну. Ванал бивтун бур личIи-личIисса къуллугъирттайсса захIматрал ххуллу: хъунама участковыйну, уголов розыскрал хъунама опер уполномоченныйну, полициянал подполковникнайн ияннин. Ци къуллугърай, чув зий унугу, дакI марцIну буллалисса захIматрахлу каялувшиндарал чулуха цимилгу лайкь хьуну ур наградарттан. Запасрайн увккун, цIанасса чIумал Руслан БижитIуев ур Пермь шагьрулул ВацIлул завод­рал управляющийну. Ванал кулпат, табасаран миллатраясса Айзанат, роддомрай хъунмур медсестрану зий бур. Вайннал ур кIия арс: хъунама дуклай ур медициналул университетраву, чIивима Аьра­лий институтраву контракт­рай къуллугъ буллай ур.
Оренбургуллал областьрай ва Калининградрай танкардал аьралуннаву къуллугъ бувну, армиягу лавхъун, хъунама уссил Русланнул хъирив Пермь шагьрулийн ивзун ур Ринатгу. Контрактрайсса къуллугъ буллай ивкIун ур Пермь шагьрулул Аьралий институтраву, БТР дачин даврил инструкторну. Махъ увххун ур шагьрулул Орджоникидзевский райондалул ОВД-лийн милицанал хъунама участковый уполномоченныйну, яла – шагьрулул УВД-лийн. Цимилагу лайкь хьуну ур ларайсса наградарттан ва бахшиширттан. Ванавусса бюхъу-гьунар чIалай, зун тIайла увккун ур Аьрасатнал МВД-лул Пермскаллал крайрайсса Хъунмур управлениялийн. Шикку Ринатлул ацIнияхъайсса шинну дурну дур, ва крайрал виваллил иширттал цинярдагу территориярттал органнан практикалийнусса ва методикалийнусса кумаг буллай, зий. Махъату Ринат ивтун ур Пермь шагьрулул Кировский райондалул ОВД-лул начальникнал хъиривчувну. Лавхъун ур полициянал подполковникнал чиндалийн. Ринат хъана­хъиссар аьралий иширттал ветерангу. Уттигъанну запасрайн увккун, цIанасса чIумал зий ур Пермскаллал крайрал Спортрал министерствалий. Ринатлул наградарттал «ххуржинтту» къакук­лусса дур.
Ринатлул кулпат, Пермскаллал крайрал ГУФСИН-лул вива­ллил къуллугърал капитан, кьюлтIсса отделданул начальник Светлана, оьрус миллатраясса бур. Вайннал дянив бур арс ва душ.
Русланнул хъирив, Ринат акъассагу, тай бигьа дакъасса шиннардий Пермь шагьрулийн бувкIун, шиккува миналул хьуну бур вайннал уссурвал Казбек ва Шамилгу. Вайннала уссу Аслан ялапар хъанай ур Самара шагьрулий.
Вана укунсса бур уссурвал БижитIуевхъул, чил миллатирттал инсантурал хьхьичI лакрал, Дагъусттаннал цIагу, лажингу узданну дуручлачисса вакилтал.
Тарихийсса ватандалия архну бунугу, даврил ва ичIаллил къайгъурдахух цуксса лавгун бунугу, уссурвал гьарца шинах чара бакъа бияй Дагъусттаннайн, Лаккуйн. Вайннал оьрчIангу ххирар буттахъал мина.

---

Тарихийсса ватандалия архну бунугу, даврил ва ичIаллил къайгъурдахух цуксса лавгун бунугу, уссурвал гьарца шинах чара бакъа бияй Дагъус­ттаннайн, Лаккуйн.

---

– Арсурвавран мюрщинийра ккаккан дувайссия, аьпа биву, МахIаммад Хачилаевлул видеоролик, зунттал инсантурал яхI-къириятрая бусласисса. Ураллай бувну, хъуни хьуну бунугу, вай пахрулий буссар цивппа дагъус­ттанлувтал бушиврия. Лаккуйнгу хъунмасса гъирарай бучIару, жула гъан-маччаминнал, шяравуминнал ххаришивурттаягу ххари хьун, къумашивурттугу кIидачIин. Тарихийсса ватандалийн бияву ттун чIалан дикIай хъунмасса кулпатрайн хъямала агьавуну, – тIий ур Руслан.
Цивппа миналул хьусса шагьрулиярив укун тIий ур ва:
– Пермь ккаллиссар обороналул чулухасса гужсса шагьрулун, шикку дуллалиссар машгьурсса Град системартту, «Прогресс» ракетартту, щалларагу артиллерия, авиациялул двигателлу. Шиккур бусса кабельный продукциялул дунияллий яла хъунмамур завод ва чIявусса цаймигу промышленностьрал предприятияртту. Пермь шагьрулул инсантал бур хъамал ххирасса, дусшиву дуван кIулсса, кумаграл ка тIитIин хIадурсса. Шикку ялапар хъанахъиминнаву чIявур Дянивмур Азиянавасса, хаснува Таджикисттаннавасса, инсантал. Махъ зуманив Пермь шагьрулиясса чIявусса инсантал жула Дагъусттаннайн бивссагу хьунни, хъинну рязину занагу хьунни, – буслай ур Руслан.
Ураллайсса къуллугъчитурал ва укунмасса инсантурал дянив­сса арардая цIувххукун, Руслан кIицI лаглай ур, цIардах, хъуни­сса цIурттах къабурувгун, хъуниминнал кабинетирттал нузкьун­ттайн сивсуну кьутI учайшиву инсантурал, шиву цанма хIакьмур, тIайламур лякъиншиврий дакI дарцIуну, ихтиярду дуруччай органнал зузалтгу, махъсса инсантал кунма, цумуну ялапар хъанай бушиву.
Къуллугъ буллалисса чIумал Русланнул ва Ринатлул цалла пишакарсса байран хьунадакьай­сса диркIун дур щалвагу коллективрал дянив. Запасрайн був­ккун махъгу вайннал ва кьини чара бакъа кIицI лагай ветерантурал дянив. Ва кьини вайнначIан дучIай хIат-хIисав дакъасса барча бавурттугу.
Вайннал хIалал бувсса хъин-хъинсса мукъурттицIун бакьлай, жугу барча тIий буру ххаллил­сса уссурваврахь пишакаршиврул байран. ЧIа тIий буру цIакьсса цIуллу-сагъшиву, ххаришиву, кулпатирттаву нахIушиву, буллугъшиву, чIяру-чIярусса ххари-хъиншивуртту!