![](https://ilchi.info/wp-content/uploads/2022/11/DJI_0646-scaled-e1667926486819.jpg)
Ларгсса тталаткьини Гъумук хьунни лакрал миллатрал тарихраву личIансса, агьамшиву ва ххаришиву хъуннасса иш. ЧIявусса ил-аьламгу бавтIун, лайкьсса даражалий хьунаавкьунни UFC-лул чемпионнал мухIулттул заллу, жула миллатрал аслансса арс Ислам МахIачев.
Лакку билаятгу, Дагъусттангу бюхттул бувсса язисса чув барча ан ватандалийн бувкIун бия Аьрасатнал гьарца мурцIния. Миннавух бия политикалул ва жяматрал ишккаккулт, депутатътал, спортсментал, ишбажаранчитал. Лакку кIанттул дазуйн бувккун бия шаннагу лакрал райондалул вакилтал. Шичча, триумфаторгу вив лавсун, Аьрасатналгу, Дагъусттанналгу ттугъру ва чемпионнал суратру кIунттихьсса бурттигьалт хьхьичIну, Гъумукун дарчуна цаннияр ца аьнтIикIасса автомашинарттал лахъира-лахъисса кьюкьа. Наниххуллий, Хан-Муртазааьлил гьайкалданучIа ливккун, хъамакъабитулунсса суратругу рирщуну, хъамал бивуна Лакку улклул хъун миналийн, Гъази-Гъумукун. Шикку тIурча, чемпионнах ссавур дакъа ялугьлай бия байрандалийн бувкIцири агьлу. ПаччахIххуллул тий ва ший бавцIусса чиваркIуннал кардугу дургьуну, Ислам хъамаллуращал лавгуна Гъумучиял Хъун-Мизитравун ахттайнчаклийн. Виричу тичча зана хьуннин жагьилтал ва дуклаки оьрчIру бия пахрулий чемпионнал шакиллугу дургьуну бавцIуну. Яла, цинявппа лагма лавгун, суратру ришлай, цахьрасса суратру Исламлухьхьун ка чичин дуллай бия. Мува мугьлатрай Жагьилтурал паркрал хьхьичIсса майданнив чемпионнал савлугъран цала гьунарду ккаккан буллай бия Дарбантуллал райондалия бувкIсса пагьламантал.
Муния махъ Ислам МахIачев барча уллалисса батIаву хьуна Гъумучиял клубраву.
Райондалул бакIчи Юсуп МахIаммадовлул, хъамаллурахь чабувкругу куну, кIицI лавгуна Абу-Дабилий хьусса UFC-лул хIала дурх единоборствардал турнирданий Ислам МахIачевлуща Бразилиянал цIанихсса спортсмен Чарльз Оливейраяр ххув хьун бювхъушиву чIярусса шиннардий бивхьусса захIматрайну ва цала чувшиврийну. Аьпагу куну, бусраврай дакIнийн увтуна чемпион вардиш уллай ивкIсса ванал тренер ва насихIатчи Аьбдулманап НурмахIаммадов. Барчаллагь увкуна Ислам тарбия увсса нитти-буттахь, уссихь, махъсса шиннардий ванащал зий ивкIсса ХIабиб НурмахIаммадовлухь.
Райондалул бакIчинал мукунна дурккуна Дальний Восток хьхьичIунмай баврил министрнал хъиривчу ХIажимахIаммад ХIусайновлул, Хабаровскаллал крайрал ХIукуматрал хъунаманал хъиривчу Карин Ссунгъуровлул ва Аьрасатнал шагьрурдай хьхьичIунсса къуллугъирттай зузисса цаймигу ватанлувтурал цIания Ислам МахIачев барча уллай тIайла дурксса телеграммарду.
Муния махъ Юсуп МахIаммадовлул, Исламлун Лакрал райондалул «ХIурмат лавайсса гражданин» тIисса цIа дуллалишивугу баян бувну, бавхIуна ванай му иширал барашинна дуллалисса ятIул лента.
Миллатрал цIанихсса арс барча увна ДР-лул Халкьуннал Мажлисрал хъунаманал хъиривчу Камил Давдиевлул, Халкьуннал Мажлисрал Законну кьамул даврил комитетрал хъунама Артур Исрапиловлул, аьрщарал ва хъуслил иширттал министрнал хъиривчу Эмиль Ттаттаевлул, шяраваллил хозяйствалул министрнал хъиривчу Зураб Куччаевлул, МахIачкъала шагьрулул депутатътурал мажлисрал хъунама Марис Илиясовлул, шагьрулул Кировский, ЦIуссалакрал ва Ккуллал районнал администрациярттал бакIчитурал: СалихI Сагидовлул, ХIажи Айдиевлул, Шамил Рамазановлул, ДР-лул Хъунисриннал советрал хъунаманал хъиривчу Сиражуттин Илиясовлул, ДР-лул Жяматийсса Палаталул хъунаманал хъиривчу Ссапар Аьбдуллаевлул, Олимпий чемпион Ширвани Мурадовлул, гьалмахтурал, Ислам МахIачев хьхьичIунай ачин ан кабакьу буллай ивкIсса ватанлув Камил ХIажиевлул.
Арс лахъа-хъун уллалисса мажлис лайкьсса даражалий сакин баврихлу Лакрал райондалул каялувчитурахь, администрациялул идарарттал зузалтрахь ва хъамаллурахь барчаллагь тIий, Исламлул буттал Рамазаннул кутIану увкуна: «Зу зула оьрчIал ххари буллай битаннав!» – куну.
Мунил ялун Ислам МахIачевлул цалагу ххи бувна:
– Ттун дакIний дур шикку ва кIанттай Олимпий чемпион Ширвани Мурадов хьунаакьлай ивкIсса шадлугъ. Тани на чIаважагьил уссияв, ва бюхттулсса кьини тара-тагу ттуйрагу дацIантIишиврул пикривагу бакъа, пахрулий чемпионнах уруглай уссияв. ХIакьину тIурчарив, на ура Аллагьнайн лаизлай, шикку ва кIанттай нава хьунаакьлакьисса чIаважагьилтуравасса цу-унугу ва даражалий лахъа-хъун уллай ккакканнав тIий.
Чемпионнан хас дурсса назмурду дурккуна райондалул дуклаки оьрчIал.
Исламлун цIуллушиву ва тIайлабацIу чIа тIисса махъру лахълай бия Гъумучиял спортзалдануву тIивтIусса ссупралухгу. ЦIан лакьавривун чемпионнал савлугъран ссаврунналун итадаркьуна яргсса салютру.