Октябрь зурул 21-нний ДР-лул Национал политикалул ва диндалул иширтталсса буллалисса министерствалул конференц — залдануву хьунни Дагъусттаннал Культуралул ва мазурдил кьинилун хас бувсса ккуркки стол. Ванил гьанумур темагу дия «Дагъусттаннал халкьуннал чIяву мазурдил дуниял дуруччаву».
Министр Энрик Муслимовлул, бавтIцири барча буллай, кIицI лавгунни Дагъусттаннал Культуралул ва мазурдил кьини жагьилсса, 2016-ку шинал хIасул дурсса, байран душиву, амма, шиная шинайн тIиссакссагу, машгьур хъанай душиву чIявусса мазру бусса республикалий, ми циняв ябаву гьарцагу дагъусттанчунал бурж бушиву. Халкьуннал Мажлисрал Комитетрал хъунаманал хъиривчу Илман Аьлипулатовлулгу кIицI лавгунни ва анжагъ байран хIисаврай кIицI лагайсса кьини дакъашиву, миллатирттал мазурдил хIакъиравусса агьамсса суаллу хьхьичIун ласайшиву байрандалул гьантрай. Ванал бувсунни чара бакъа кьамул дуван багьлай бушиву Дагъусттаннал мазру ябавриха зузисса паччахIлугърал программа, республикалул бюджетрава хасну му даврин арцугу итадаркьуну.
«Аьрасатнаву национал политика гьаз дуваврил стратегиялий ккаккан бувну буссар Аьрасатнал агьалинал мазурдих къулагъас дуваву национал политикалул гьанусса мурадну хъанахъишиву», – увкунни ванал.
А. А. Тахо-Годил цIанийсса Дагъусттаннал педагогикалул элмийсса институтрал ниттил мазурдил секторданул элмийсса хъунмамур зузала Светлана Мутаевал балжину бувсунни ниттил мазрал ва литературалул дарсру дишаврил хIакьинусса тагьардания. Дагъусттаннал паччахIлугърал университетрал Ниттил мазру лахьхьаврил центрданул директор, филологиялул элмурдал доктор Марина ХIасановал бувсунни центрданул дуллалисса давурттая. Докладру бунни ниттил мазурдиха зузисса цаймигу аьлимтурал.
