Къатта лавсъсса чIумал дагьайсса
вычет

Къатта ласаву му хъунма­сса харж буккан баву дур. Амма, чансса бухьурчагу, ка-кумаг хьунсса иш хъанай бур хъу­слил (имуществалул) вычет даву. Хъуслил вычет – му хъанай дур зузисса инсаннал доходрая дургьуну диркIсса налограя ма­хъуннай зана даву. Вычет ласун шайссар, къатта ипотекалий лавсун бунугу. Амма му ласун бюхъайссар, так инсан официальнайну зий ухьурча ва ганал доходраягу налог най духьурча. Налог къадуллалисса инсаннан вычетрайнсса тамахI бикIан къааьркинссар.

Цукун хIисав
дайссар вычет?

Ссан ласурчагу къатта (мулк), вычет ласун бюхъайссар так 2 миллион къурушрая – 260 000 къуруш (вай хъанахъис сар 13%). Агарда къатта ласлай бухьурча ташулул хьусса лас ва щар, цивппагу хIукуматрал давур­ттайсса, миннахь ихтияр дуссар кIиннаннагу тIалав дан вычет (520 000 къ.).

Цукунминнан
къадагьайссар
налограл вычет?

1) Налогру дуллай къабивкI­миннан
2) Агарда къатта лавсун бивкI­хьурча хъинну гъансса инсаннаща (кровный родственник), ласнал ягу щарссанил кулпатравасса маччаминначIату лавсун бухьурча, мукунминнаща бюхъайссар вычет ласун.
3) Къатта вила цIаний бацIан бувсса документру (вступление в право собственности) вила кIунттихьхьун лавсун мукьах.
4)Так цалли вычет ласун бюхъайсса.

Тари вычет ласун бучIисса?

Документру булун бучIиссар сделка дурсса гьантрайва. Агарда зу къатта ласлай бухьурча къуртал къабувсса къатраву, къурталгу бувну, кьамул баврил акт щаллу дурну махъри документру батIин бучIисса.

Цукунни ласайсса
налограл вычет?

Ласайссар налоговый­лийхчIин ягу вила даврил хъуна­манайхчIил (работодатель). БавтIун циняв документру, лавгун зура прописка дурсса райондалийсса налоговыйлийн, чичайссар аьрза. Сделка дурну шин шайхту, бучIиссар вычетрал хъирив буккан. Даврийсса хъунаманайхчIин ласлай бухьурча, аьрза булун бучIиссар шин къуртал хьуннинма, 3-НДФЛ справкагу къааьркинссар, арцугу цал архIал къаласунтIиссар. 260 000 къуруш хьунцIакул, харжирая подоходный налог къадугьлантIиссар.

Куклу бувну бур утти вычет ласаврил
масъала

ФНС-лул сайтрай налог дулун кабинетраву аьрза буцIин бан аьркинссар. 3-НДФЛ-лул справкагу, вайми документругу чунчIав гьан буллан къааьркин­ссар. ФНС-лул системалул цала тасттикь бантIиссар къатта ласаву. 30-45 гьантлува зул счетрайн арцу дичин аьркинссар.
ХIадур бувссар
Т. ХIажиевал